16 Sep 2019 05:25

inkhel

MSSC-in Basketball Team a lawmpui

46th Sub Junior National Basketball Championship 2019-a champion Mizoram team lawmpuina hun September ni 16, 2019 (Thawhtanni) chawhma dar 11:00 khan infiammite inpuiah Mizoram State Sports Council chuan a buatsaih.

September ni 3-9, 2019 chhung khan Cuttuck, Odhisa-ah 46th Sub Junior National Basketball Champpionship khelh a ni a, Mizoram team chuan final-ah Punjab 51-46 in an hneh a, a vawi thum nan India ram champion an ni.

Mizoram Basketball team lawmpuina huna khual lian T.C.Pachhunga, Ex.MLA, Vice Chairman, Sports & Youth Affairs, Tourism Board chuan, " Ka naute hi tumruhna leh thawhrimna avanga champion an ni a, an nu leh pa, MBBA leh sawrkar thlenga chawimawitu an nih avangin kan chhuang takzet a  a ni. Kum 1981 leh 1985-ah te State Games buatsaih a ni tawh a, mahse state tak tak kan nih hnuah buatsaih a la ni lo thung. 

Kumin December-ah State Games buatsaih tumin hma lak chhoh mek a ni a, infrustructure leh thil dang tam takah danglamna leh hmasawnna kan hmu chho mawlh mawlh bawk a. Kan tum ber erawh Olympic Games-a Mizo thalaiten medal an awrh lai hmuh a ni a, kan nghakhlel tawh hle a ni" a ti.

Basketball-a Mizoram sulhnu sawiin khual lian chuan, " Kum 2001-ah a vawi khat nan Mizoram kan champion a, kum 2006-ah kan champion leh a, a hnu kum 13-ah champion lehin Mizoten talent kan neih that zia a chiang" tiin player te sang leh zawk ropui medal hlawhchhuak zel turin duhsakna a hlan.

Thusawitu dang Sports & Youth Affairs, Tourism Board member, Mizoram State Sports Council leh Mizoram Olympic-a Vice President hlui Pu Ramzaua chuan, " Hengte hi player thawhrimna piah lamah Sports Association hruaitu leh MSSC thawhrah a ni a ti a, Mahnia thuneihna sang tak nei Sports Association 32 enkawl hi a hautak tih ka hria a, Secretary leh a thawhpuite hnathawh hi pawn lam mi leh sawrkar hnathawk dang thawh theih ve ngawt chi a ni lo. Technical mi, helama tui leh inpe, a ngaihna hriate enkawl a nih avangin vawiinah a hlawhtlinna Mizoramin a tel mek a ni" a ti.

National Sub-Junior Basketball Championship-ah Mizoram sulhnu a nei nual tawh a, 2001, 2006 leh 2019-a an champion bakah kum 2000-ah bronze medal, kum 2002-ah silver an dawng tawh bawk. Semifinal an thlen avangin kum 2020-ah chuan Mizoramin state tha bikte huang Level I an khel thei tawh ang.

Mizoram Basketball team lawmpuina hun hi Pu C.Laltlanthanga, Secretary, MSSC chuan a kaihruai a, a tih thin danin player te hnenah lawmpuina thilpek a hlan leh theuh a ni.

Sub Junior Mizoram Basketball team -

1. Lallianmawia, Chawnpui

2. C.Malsawmpuia, Tuikual South

3. C.Lalrinawma, Luangmual

4. Joel Lalmuansanga, Zarkawt

5. Johan Lalthianghlima, Khatla South

6. Christopher Ngurliankima, Upper Republic

7. Jeptha Laltanpuia, Tuikual South

8. Emmanuel VL Awmpuia, Nursery

9. Lalremsanga, Ramthar

10. Marius Lalhmahruaia, Khatla South

11. David Lalrinsanga, Tuikual South

12. Easter Malsawmtluanga, Republic Vengthlang

Coach : Marc L.Sailo, Zarkawt

Asst.Coach : Denghmingliana, Kanan

Manager : Dennis Vanlalmawia, Khatla South