25 Jul 2020 03:33

inkhel

MSSC-in an Secretary kalchhuak tur an thlah

Ni 24, 2020 (Zirtawpni) chawhnu khan Secretary kalchhuak tur Pu C.Laltlanthanga chu Mizoram State Sports Council-a thawktute chuan Muallungthu Sports Complex-ah thlahna hun an hmang.

Thusawitu Sports Council Vice President Pu V.Lalzawmliana chuan Pu C.Laltlanthanga kaihhruaina hnuaiah Mizoram Sports-in nasa taka hma a sawn thu sawiin infiammi chherchhuahna kawngah leh Sports Association thawhhona kawngah sulhnu ropui tak a hnutchhiah a ni a ti.

Secretary kalchhuak tur Pu C.Laltlanthanga chuan Mizoram State Sports Council-a kum 25 a awm chhung chu a dam chhunga a hun tawn ropui leh chanchin ngaihnawm ber a nih thu sawiin Secretary hna a chelh chhunga hlawhtlinna hrang hrang an neihte chuan a tihlim thu leh thawktu la awm mekte fuihna thu a sawi bawk.

Thlahna hun hi Pu H.Lalremliana, Chairman, Staff Welfare Committee in a kaihruai a, thawktu hrang hrangten thusawina hun an hmang bawk a. Staff Welfare Committee chuan a tih thin danin Voluntary Pension-a chhuak tur Pu C.Laltlanthanga hnenah sumfai Rs.50,000 leh ngaihhruina thuziak an hlan a, hemi hnu hian intihlimna hunte hmangin tlaiah zanriah an kilho nghal.

Pu C.Laltlanthanga hian 1995-ah Mizoram State Sports Council zawmin hemi hma hian Aizawk Middle School-ah Headmaster hna thawk thin. Kum 2001-ah a ngheta lutin Sports Promotion Officer hna a chelh chho chelh chho am Sports Promotion Officer atang hian kum 2009-ah Sr.Sports Promotion Officer-ah kaisangin kum 2012-ah Secretary hna a chelh chho leh ta a ni.

Hnaa inpe zo, harsatna lam aia thawh theih dan kawng dap thin a ni a, Mizorama Office hna thawk chak ber mai ni lo, India rama thawk chak ber kan ni tur a noi tiin tan a la nasa em em a ni. A enkawl Sports Association leh Staff-te fak a hlawh hle a, a hun chhungin hnuhma tha tak tak hnutchhiah a ngahin Mizote khawvela infiamna khawmpui lian ber Summer Olympiic-a kan tel ve theihna tur kawngah hma a la nasa hle.

NIS Patiala-ah 1987-ah Diploma Certificate Course zoin Judo Coach a ni a, 3rd Dan Blackbelt a kai hman hial a. International referee ni thei turin Vietnam-ah exam a pass chhuak a, hun rei tak Mizoram Judo Association president hna a chelh bawk.

Sports hmasawnna engtinnge an kalpui tih hmuh a duh thin avangin mahni sum sengin a zin nasa hle a, Beijing Olympics 2008, Doha Asian Games 2006, Rio Olympics 2016-ahte kalin vawi engemawzat National Games leh North East Games-ahte a fehchhuak tawh bawk.

Tunah hian Mizoram Olympic Association-ah Secretary General hna chelh mekin Indian Olympic Association-ah Associate executive committee member a ni bawk.

Mizoram sawrkar chuan MSSC Secretary thar turin Pu John |anpuia, MCS, tuna Joint Director, SYS chu a ruat fel tawh a, thla thar atangin a hna a zawm tan ang.