Mizoram Super League Season 2 semifinal game 1-ah Tuikual South chuan 77-62 in Mission Veng Vikings an hneh a, March ni 31 Ningani zan khan Hawla Indoor Stadium Republic Vengthlangah game 2-na khelh leh a ni a, Mission Veng Vikings chuan 89-78 in hnehna an chang ve leh thung a, April ni 7 Ninga zan dar 8:00 PM-ah final lut tur zawk a hriat tawh ang.
(adsbygoogle = window.adsbygoogle || []).push({});
Semifinal game 1 quarter hnuhnung berah buaina a awm vangin buaina bul tumtu player pahnih te hrem an ni. Tuikual South center MS Dawngzela a khel thei lo a, coach KC Lalliantluanga'n a naute a ho thei lo bawk. Mission Veng Vikings Gujarat center palian Dishant erawh a lo kir thung.
First quarter-ah Tuikual South chuan bul tan tha zawkin point guard Rohlua leh forward Vanchhuangpuia an thawh hlawk nghal hle a. 3 points vawi khat ve ve nei bawkin center Zodinthara'n a rawn thlawp tha hle bawk. Mission Veng Vikings-ah Lalrina Renthlei chuan bul a tan lova, Dishant chuan bul tan mahse a theina an chhawr rih lo, shooting guard Rempuia leh forward Nunpuia thawh hlawk hle mahse Tuikual South chuan 21-18 in first quarter-ah hma an hruai.
Second quarter-ah Mission Veng Vikings insiam thain Lalrina Renthlei a rawn luh hnuah game a danglam nghal a. Timeout an hman that bakah Dishant a rawn thlawp tha hle a, 3 points vawi 2 rawn nei nghalin Dishant chuan point 14 zet a score a, second quarter a zawh meuh chuan Mission Veng Vikings chuan 46-27 in hma an hruai ta a ni.
Third quarter-ah Mission Veng Vikings chuan hma hruai chhunzawm zelin Dishant leh Lalrina Renthlei chuan an thawh hlawk hle a, point 7 ve ve score-in Rempuia leh Nunmawia ten an rawn thlawp tha hle bawk a, 3 points vawi khat ve ve an rawn nei bawk. Tuikual South tan Vanlalruata leh Vanchhuangpuia te thawh hlawk hle mahse midangin an thlawp tha tawk loh a lang. Chutih rualin turnover an ngah team game an khel hlei thei lo bawk. Third quarter a zawh meuh chuan Mission Veng Vikings chuan 68-51 in hma an hruai ta a.
Quarter hnuhnung berah Mission Veng Vikings bawk chungnung lehin Dishant, Lalrina Renthlei leh Rempuiate an thawh hlawk chhunzawm zel, Lalrina Renthlei leh Rinchhana ten 3 points vawi khat ve ve neiin an thawh hona a that bakah Dishant leh Lalrina Renthlei an in nghahna an ni a, an chakna hnar an ni bawk. Tuikual South tan F Zodinthara a che chhe lo hle a, Lalrohlua leh Vanchhuangpuia ten rawn thlawp ta viau mahse defensive rebound-ah Dishant an ngam loh bakah defence khauh tawk loh an tuar bawk. Bul tan tha mahse Dishant leh Lalrina Renthlei te inkawp fuh tak kha an ngam lo a ni ber mai hun tawp dawnah Dishant-a dunk phei chu Vikings fans te lawm a hlawh hle nghe nghe. Hun atawp meuh chuan Mission Veng Vikings chuan 89-78 in hnehna an chang ta a ni.
April ni 7 Ningani Semifinal-1 Game 3 Fixtures:
08:00 PM Mission Veng Vikings vs Tuikual South
(adsbygoogle = window.adsbygoogle || []).push({});