MSL 4 play-off atanga disqualified an nih hnuah Mizoram Super League Board chuan Champhai Minikins Basketball Club chungchang an ngaihtuah leh hnuhnawh a, February ni 13, 2017 khan qualifying khel team tin atanga aiawhte nen meeting neih a ni a.
Hetah hian MSL Board chuan qualifying chu a tir atanga khel tha leh turin a rel a, Republic VR4 leh Dawrpui Vengthar SC chuan an remti thlap a, Minikins erawh chuan hautak taka hnehna an channa chawhchhiat a ni mai tur leh a bul atanga tan that leh tura rawtna awm chu an pawm thei ta lova, MSL qualifying atangin an inhnukdawk ta a ni.
Hemi chungchangah hian MSL Board chuan thuchhuah a siam nghal a.
"Ni 13/02/2017 a MSL board in MSL-4 qualifying khelh meka buaina awm chungchangah MSL-4 qualifying khel tura tling club pathum Champhai Minikins, Dawrpui Vengthar Sporting Club leh Republic VR4 te joint meeting a neih pui a. MSL Board-in a thuthlukna "Tuna MSL qualifying khelh mekah thil felhlel a awm avangin qualifying hi a bul ațanga khelh țhat", nise tia a rel chu Champhai district champion Minikins Basketball Club ten pawm thei lova.
Qualifying atanga an inhnuhdawh tak avangin MSL Board chuan Republic VR4 te chu Division I champion an nih angin MSL-4 khel tura tlingah a puang nghal a,Division I runner up Dawrpui Vengthar Sporting Club te chu MSL-4 playoff khel tura tlingah a puang bawk a ni." tiin.
Hemi chungchangah hian Champhai Minikins pawhin thuchhuah an siam chhunzawm ve nghal a.
"Vawiin ni 13 February 2017 dar 3 pelh hret khan Pu Chalrosanga, MLA, MBBA President ni bawk inah MSL Board, Champhai Minikins(CDBBA President Pu C.Vanlalnghaka'n min telpui), VR 4 leh Dawrpui Vengthar BC chuan joint meeting kan nei a, MSL board chuan MSL Playoffs 2017-a kan buaina neih mek chingfel tur hian thuthlukna siam sa an nei a.
Chu an thuthlukna siam sa chu MSL qualifying match khelh tawh leh ruahmanna awm tawh zawng zawng cancelled a, player ngai vekin a bul atanga engkim tan that leh tur tih a ni.He an ruahmanna hi club ten kan pawm leh pawmloh min zawt vek a, VR4 leh Dawrpui Vengthar BC te chuan lawm takin an pawm a.
Keini Champhai Minikins Basketball Club (VR 4, 76-72 in kan match lo khel tawhah kan hneh tawh) chuan kan zahawmna humhimna atan pawm chiah kan ngaihloh avangin MSL thuthlukna hi kan pawm theilo a, he MSL qualifying playoffs atang hian kan inhnukdawk ta a ni." tiin.
Buaina bul chu
Minikins hi Champhai District Basketball Association (CDBBA)-in tournament an siam thina champion ngun ber an ni a, MSL play-off khelh an tum avangin player lak thar an mamawh, chu chu CDBBA hnenah an thleng, CDBBA chuan an lo phalsak a, chumi chungchang chu play-off a an khingpui te hian Organising Board lamah thlenin, transfer dan kalh nia hriat an nih avangin thuneitute chuan Minikins hi an disqualified an ni ta a ni.
A khawi lai nge dik lo?
Inkhel.com-in thu kan dawn dan chuan, MBBA hnuaiah hian District hrang hrang Association an awm a, Aizawl erawh MBBA hnuaiah an awm. MBBA chuan District-te chu an huamchhungah chuan thuneihna sang tak a pe a, mahni inrelbawl turin a ti. Transfer chungchangah pawh CDBBA phalna thlapin Minikins hian player an la lut a, mahse hei hi MSL dan khalh nia hriat a ni a, Board chuan Minikins a disqualified ta a ni.
Minikins an disqualified chhan kha enge ni ta ber?
Vawiin lama an rorelnaah kha chuan; tuna an player ngai ang bawka qualifying khel leh turin MSL Board khan a rel kha a ni a. Transfer chungchang avanga disqualified ni si; MSL Board-in player ngaia qualifying khel tha leh tura a ti hi, a tira an disqualified chhanah khan Board lam pawhin tan chhan mumal tak an nei bik lo tihna a ni thei angem?
MBBA atangin Champhai District Basketball Association a inhnukdawk dawn?
Champhai hi Basketball uarna khua a ni a, player tha tak tak MSL-ah pawh an lo thawh tawh thin, District dang nena khaikhin pawhin anni aia active hi an awm kher bik lovang tih theih a ni a, MSL qualifying-a an thil tawn avang hian an hnual hle.
Champhai District Basketball Association hian Mizoram Basketball Association hnuaia awm reng hi a tulna a hre tawh lova, a tira thuneihna a pek ang thlapa thil an ti chunga namnul an nih chhunzawm danah hian an lawm lo hle. Chuvang chuan reilote chhungin Press Conference an nei vat dawn niin mi rintlak tak hnen atangin inkhel.com chuan thu kan dawng a ni.