Mizoram Super League season thar tan a ni tep, MSL 4 season-a khel tur zawnna play-off khelh mek a ni bawk a. Republic VR4, Minikins Champhai leh Dawrpui Vengthar SC te chuan play-off khelin, Minikins Champhai hian an match hmasa berah hnehna an chang a, a tukah erawh thuneitute lamin an disqualified ta a ni.

February ni 9 zan khan Minikins chuan MSL qualify tura rinkai ber VR4 an hneh tlat mai, February ni 10 zanah Minikins hian Dawrpui Vengthar SC an hmachhawn dawn, mahse disqualified an ni tih hrilh an ni ta a, beisei sang tak nen Champhai atanga fehchhuak Minikins te chuan an tum ram an thleng thei dawn ta lo a ni.

Minikins hi Champhai District Basketball Association (CDBBA)-in tournament an siam thina champion ngun ber an ni a, MSL play-off khelh an tum avangin player lak thar an mamawh a, chu chu CDBBA hnenah an thleng, CDBBA chuan an lo phalsak a, chumi chungchang chu play-off a an khingpui te hian Organising Board lamah thlenin, transfer dan kalh nia hriat an nih avangin thuneitute chuan Minikins hi an disqualified an ni ta a ni.

Association leh club lam atanga official taka thuchhuah a la awm lova, Mizoram Basketball Association hian engtiang chiahin nge District Basketball Association inrelbawlna a neih tir? A khaikhawmtu leh District Association-te thawhhona a tha lo em ni? CDBBA hruaitute tihsual Minikins hian an tuar ta tihna a ni thei angem? CDBBA, MBBA leh club lamin thuchhuah an la nei lova, Mizo Basketball ngainatute chuan thuchiang an ngaichang mek a ni.