May ni 1, 2015 zan khan Mizoram Super League final chu Halla Indoor Stadium-ah khelh a ni a, Khatla TBL chuan 67-61 a Zarkawt BCA hnehin champion hmasa ber an ni ta.

Mizorama Basketball inelna awm tawh zawng zawng zinga la ropui ber Mizoram Super League hmawr bawknaah hian Basketball fans thahnem tak Hawla Indoor Stadium khat thap an pungkhawm a, lam hmuhnawm tak tak nen halftime show ropui tak kan en bawk a ni.

TBL hian hnam dang pahnih squad-ah an telh a, hemite pahnih hian final an khel thei ta bawk a. Pratham Singh chu inkhelh chhung zawngin langsar vut nilo mahse point hlu tak tak a score nual. Free throw-ah a throw zawng zawng atangin 90% lai a lut nghe nghe a ni.

TBL-in bul an tan tha zawk a, first quarter a zawh meuh chuan 19-13 laiin BCA lakah hma an hruai hman. 2nd quarter-ah BCA an rawn tang hle a, Dannis-a a khel tha hle a, 2nd quarter tawp lamah phei chuan BCA hian point khat chiahin an thlau. Mahse free throw-ah erawh TBL an chungnung zel a, 2nd quarter-ah hian TBL tan Lan-a a khel tha hle a, rebounds pawh a la nual. Mapuia rawn lut mahse Pratham a langsar zawk thlat. Half time a nih chuan 31-28 in TBL chuan hma an hruai a.

3rd quarter-ah BCA an rawn khel tha hle a, Jackson a rawn langsar fal nalh, 3rd quarter minute 7 la awmin BCA chuan an umphak a, 36-35 in BCA hian TBL lakah hma an hruai ve zuai, mahse 36-36 in TBL-in an rawn nihrual ta . TBL hian heta tanga an tlansan leh chhunzawm nghal theihna chhan chu Mapuia free throw leh Pratham-a free throw te an ni. 3rd quarter a zawh chuan 48-42 in BCA chuan hma an hruai a.

4th quarter -ah erawh TBL an chungnung fal nalh a, free throw an thelh duh tawh bawk si lova, tichuan hun a tawp chuan 67-61 in Khatla TBL chuan hnehna an chang ta a ni. Team hnihte danglamna hi hote a ni a, game-ah chuan an inhnehtawk hle a, free throw-ah an inluh hnem hleih deuh a ni. Khatla TBL tan Pratham Singh chuan 21 points lai a nei a, heng a points-te hi free throw atanga a luh deuh vek a ni.

Pratham Singh a langsar hle a, rebounds vawi 10 lai a la a, 3 points vawi hnih a lut bawk. Khatla TBL tan R Lalmalsawma defending a tha hle a, block vawi 4 lai a nei nghe nghe a ni. Zarkawt BCA tan Henry a khel tha a, 14 points a nei a, three points pawh vawi hnih lai a nei bawk.

Mimal lawmman sem a ni a, Most defensive player-ah Moses Zoremmawia (Mission Veng Vikings) thlan a ni a, Most Valuable Player-ah H Laldinsanga (Khatla TBL) thlan a ni bawk. Pathumna Tuikual South-in Rs. 25,000 an dawng a, palina Mission Veng Vikings-in Rs 20,000 an dawng a, Zarkawt Serpents chuan Rs. 15,000 dawngin a tawp ber Chaltlang Ryders chuan Rs. 10,000 an dawng a.

Champion Khatla TBL chuan Rs. 1,00,000, medal leh Trophy an dawng a. Pahnihna Zarkawt BCA chuan Rs. 50,000, medal leh trophy an dawng bawk a ni.

TBL coach Mapuia chuan," Sawi ngaihna a awm lo, Pathian chungah ka lawm, fans chungah ka lawm, engkimah ka lawm hle a ni. Tunah hian kan club hian hei aia tha hian kan la khel thei a ni," tiin a sawi.

BCA coach R. Liansangpuia chuan,"TBL kan lawmpuia, an thawhrimna kan hriatpuia, hlim takin in champion lawm turin duhsakna kan hlan che u. Season tharah chuan chuan champion tumin kan rawn lang leh ang. Fans chungah lawmthu kan sawi, player pahnih khat kan lakbelh dawn a ni." tiin a sawi.