Mizoram Super League (MSL) season 6 chu March ni 6, 2021 (Inrinni) chawhnu dar 1:30 khan Hawla Indoor Stadium-ah Relegation game 3 Ramhlun SC leh Chawnpui BC ten ankhel a, Chawnpui BC chuan 79-72 in Ramhlun SC an hneh.

Club pahnih te hi an intawn hmasak berah Chawnpui BC hian 78-76 in Ramhlun SC an hneh a, an intawn vawihnihnaah Ramhlun hian 82-71 in an lehthal thung a, game 3-ah erawh Chawnpui BC an chungnung ta zawk a, Qualifying atanga tling Basketball Club Bethlehem nen MSL 7 Playoff an khel dawn ta a ni.

Chawnpui BC tan RVL Hriatrenga (23pts, 10 rebound), Laltlanhlua (19pts) leh Zodina Chawngthu (13pts) te an thawhhlawk hle a, an chakna hnar an ni. Ramhlun SC tan PC Lalramthiamnghaka (25pts, 9 rebound) leh Emanuel Lalfakawma(16pts) te langsar mahse hneh chang turin midangin an thlawp tha tawk lo.