16 Mar 2020 09:49

inkhel

​MSL 6: Tuikual South hnehin Chanmari Vikings-in Semifinal an lut

Mizoram Super League (MSL) Season 6 khelh mekah March ni 16, Thawhtanni zan Hawla Indoor Stadium, Republic Vengthlangah Chanmari Vikings leh Tuikual South inhmachhawnin Chanmari Vikings chuan 94-70 a hnehna changin semifinal an lut. March ni 17, Thawhlehni zan dar 7:30-ah Ramhlun SC leh Khatla TBL ten an match hnuhnung ber an khel ang.

Team pahnih te hian an match an khel zo tawh a, Chanmari Vikings hian League round-ah vawithum hnehna changin vawihnih an chak lo a, point 8 neiin semifinal an lut chiang ta a ni.

Tuikual South hian league round-ah vawihnih hnehna changin vawithum an chak lo a, point 7 neiin table-ah pathuman an ni rih a, semifinal luh beiseina la nei mahse, Khatla TBL leh Ramhlun SC hian match khat khelh hmabak anla neih ve bawk avangin an result azirin semifinal lut lo thei an ni.

Chanmari Vikings hian hnehna chan ngei tumin foreigner player Raymond Miller Jr. chu bul an tan tir a, hnehna an chang. Raymond Miller Jr. hian (39pts, 29reb, 2ast, 1blk, 1stl) double double neiin an chakna hnar a ni. Hnehna an channa kawngah Zonunsanga (17pts, 2reb, 1stl) leh C. Lalchhandama (14pts, 8reb, 4ast) an thawh hlawk hle bawk.

Tuikual South hian foreigner player an lak tunlai hrileng boruak avangin foreigner Darrell Bowie chu haw tir a ni a, mizo hlangin an khel a, hnehna an chang zo lo. Tuikual South tan Dennis Lalmuanpuia (16pts, 11reb, 2blk, 2stl) chaun double double neiin thawhhlawk hle mahse hnehna chang turin an thawh hona that tawk loh an tuar a, F. Zodinthara (16pts, 5reb, 3ast, 1stl) leh Lalfakzuala (14pts, 6reb, 3ast, 1stl) an langsar hle bawk.

(adsbygoogle = window.adsbygoogle || []).push({});