Mizoram Super League (MSL) Season 6 khelh mekah March ni 13, Zirtawpni zan Hawla Indoor Stadium, Republic Vengthlangah Chanmari Vikings leh semifinal lut chiang tawh Zarkawt BCA inkhelah Zarkawt BCA chuan 77-68 in Chanmari Vikings an hneh. Zarkawt BCA hian an match an khel zo tawh a, point 10 neiin hmahruitu annih chhunzawm zel a ni.

Zarkawt BCA chuan foreigner player an lak Malik Price Martin leh Showkin Shetty chu tunlai hrileng vangin an haw a, chhawr thei lo mahse, Sahaj R Patel (11pts, 16reb, 4blk, 2ast) erawh anla chhawr a, inkhel bul tan lo mahse, a thawh hlawk hle. An chakna hnar erawh Lalrina Renthlei (33pts, 8reb, 3astl, 2ast) a ni. Hnehna an channa atan Zonunsanga (11pts, 9reb, 4ast, 3stl) leh Lalremsanga (10pts, 3reb, 2stl, 1ast) an thawh hlawk hle bawk.

Chanmari Vikings hian hnehna chan ngei tumin foreigner Raymond Miller Jr (31pts, 18reb, 2stl, 1ast) chuan bul tan mahse, hnehna a chanpui thei lo. Zonunsanga (15pts, 6reb, 3stl) pawh athawh hlawk hle mahse, hnehna chang turin an thawh hona that tawk loh an tuar a, an tum fuh loh zan ani bawk nen hnehna an chang zo ta lo a ni.

Chanmari Vikings hian match khat khelh hma bakin March ni 17, Thawhlehni zan dar 6:30-ah Tuikual South SC an hmachhawn ang. Khelh tawhah point 6 neiin semifinal luh beiseina anla nei ve bawk.

(adsbygoogle = window.adsbygoogle || []).push({});