12 Mar 2020 10:17

inkhel

​MSL 6: Entu Mipui awmlo in Chawnpui BC an chak

Mizoram Super League (MSL) Season 6 khelh mekah March ni 12, Ningani zan Hawla Indoor Stadium, Republic Vengthlangah Coronavirus chungchanga Mizoram State Sports Council thuchhuak angin entu mipui awmlo in kaithar ve ve Chawnpui BC leh Ramhlun SC te an inhmachhawn a, Chawnpui BC chuan 72-69 in Ramhlun SC an hneh.

Chawnpui BC tam state pawn player Harry Roop Singh chuan bul a tan a, Ramhlun SC tan state pawn player Eban Hyams chuan bul a tan ve bawk. First quarter-ah Ramhlun SC chuan 26-19 in hmahruai mahse second quarter-ah Chawnpui BC chuan umphakin 14-12 in hma an hruai a, third quarter-ah Ramhlun SC chuan 21-17 in hmahruai leh mahse quarter hnuhnung berah Chawnpui BC chuan lehthalin 22-10 in hnehna an chang zui ta a ni.

Chawnpui BC tan Laltlanhlua (23pts, 13reb, 3blk, 3stl, 1ast) chuan double double neiin Harry Singh (18pts, 17reb, 10ast) chuan double double a nei ve bawk a, an chakna hnar an ni. Hnena an channa kawngah Andre Lalhruaitluanga (13pts, 3reb, 2stl, 1ast) leh Jackson Lalrintluanga (10pts, 3reb, 2ast) te sawi hmaih theih an ni lo.

Ramhlun SC tan Eban Hyams (24pts, 13reb, 8ast, 1stl) chuan double double neiin thawh hlawk hle mahse hnehna a chanpui thei lo. Emmanuel Lalfakawma (12pts, 1ast, 1stl) leh Lalruatpuia (10pts, 13reb, 4ast, 3blk) te langsar ve bawk mahse an thawh hona that tawk loh chu quarter hnuhnung berah an tuar ta a ni.

Chawnpui BC hian an match an khel zo tawh a, point 6 neiin a sang pali zingah awm mahse semifinal lit turin midang result-ah an in nghat a ni. Ramhlun SC hian match khat khelh hma bak la neiin March ni 18, Nilaini zan dar 6:30-ah Khatla TBL an hmachhawn ang a, hnehna an chan chuan semifinal an lut ve thei tho bawk. Khelh tawhah point 5 an nei mek a, table mawngphah anluah lum rih a ni.

(adsbygoogle = window.adsbygoogle || []).push({});