Mizoram Super League season 2 chu April ni 22, 2016 zan khan Hawla Indoor Stadium-ah khelh zawh a ni ta a, Final Game 1-ah Tuikual South an chak a, Final Game 2-ah Khatla TBL an chak ve leh a, Final Game 3-ah Khatla TBL chuan 86-74 a hnehna changin an title an humhim ta a ni.
Mizoram Super League hi 2015-a neih tan a ni a, season hmasa berah Khatla TBL hian Zarkawt BCA hnehin title an lo la tawh a, MSL vawi hnih neih ni tawhin Khatla TBL chiah hi champion thei an la awm a ni. Most Valuable player-ah Vanlalmuana (TBL) thlan a ni a, Best defensive player-ah Vanchhuangpuia (Tuikual South) thlan a ni a, Champion team hian Rs. 1,20,000 leh trophy an dawng a, pahnihna hian Rs, 60,000 leh trophy an dawng bawk a ni.
Final Game 3-ah hian Khatla TBL tan Vishesh Bhriguvanshi chuan 18 points a score a, Eddie Zaithanmawia chuan 15 points score-in, Pratham Singh leh Vanlalmuana te chuan 12 points leh 13 points an score bawk a ni. Quarter hmasa bera bul tan lo Rakesh chuan Tuikual South tan 20 a score tling a, Vanchuangpuia chuan 18 score tlingin, F Zodinthara chuan 17 a score bawk a ni.
MVP : Vanlalmuana
Khatla TBL-in bul an tan tha a, hma an hruai nghal a, a tawp thlengin hma an hruai ta a ni. Quarter hmasa berah Vishesh Bhriguvanshi a che tha hle a, Lana chuan Tuikual South attacking a dangchat nual a, interception vawi engemaw zat a nei. Hei hian TBL dinhmun a tih that phah a, quarter hmasa ber a zawh chuan 22-8 laiin Khatla TBL chuan hma an hruai.
Hremna hmang zo KC-a chuan a team Tuikual South a enkawl thei ta a, hei vang hian quarter hnihnaah chuan danglamna a awm ngei ringin Tuikual South fans chuan an thir thup a. 2nd quarter hun chanve hnulamah KC-a chuan Rakesh a dahlut ta a, hei hian game-ah awmzia a rawn nei chho ve deuh. Tin, Tuikual South tan Eddie Zothanpuia chuan lay up mawi zet zet vawi hnih a rawn nei bawk a, Tuikual South an phur chho a, an game a rawn dik chho mek. Hetih lai hian Khatla TBL dinhmun a derthawn tak tak hmain hun a tawp ta. Half time a nih chuan 48-30 in Khatla TBL chuan hma an hruai a.
3rd quarter a hmuhnawm hle a, Tuikual South chuan theih tawp chhuah a, Rakesh, Chpa leh Zodinthara te chuan an thawhhlawk hle a, 3rd quarter a zawh chuan 65-55 a ni a, point 10 chiahin an inthlau ta. 4th quarter a pui hle a, inthlau hle mahse thil danglam thut thei reng a ni tih TBL chuan an hria a, hun tawp lamah Zodinthara a foul out ta, hei hi Tuikual South chuan an tuar chhunzawm ta a, 4th quarter-ah hian umphakna chance Tuikual South hian nei mahse TBL chuan 86-74 in hnehna an chang ta a ni.
Final en mipui an tam hle a, Hawla Indoor Stadium-ah an khah thap avangin pawn lamah big screen-a enna siam a ni a, Indoor Stadium pawn pawh mipui an khat thap bawk a ni.
Photographer : PC Lala