​MSL 2-ah Khatla TBL Final an lut

02nd April 2016, 04:04PM

Mizoram Super League Season 2 semifinal-1 game 1-ah Khatla TBL chuan 71-66 in Zarkawt Serpents an hneh a, April ni 1 Zirtawp zan khan Hawla Indoor Stadium Republic Vengthlangah game 2 khelh leh a ni a, Khatla TBL chuan 60-58 an hneh nawn leh a,final an lut chiang ta a ni. 

Zarkawt Serpents hi coach Arvinder Singh leh center Sahil Sharma ten telpui lo mahse an khel a hmuhnawm hle, point forward Lianhmingmawia a khel tha leh hle nghe nghe. Jonathan, K Lalhruaitluanga leh Robert-a te an thawh hlawk hle bawk. Khatla TBL hian League Round-ah Mission Veng Vikings hneh lo mahse Zarkawt BCA leh Tuikual South awlsam takin an hneh thung. Semifinal game 1-ah 71-66 in Zarkawt Serpent an hneh hnuah game 2-ah hnehna an chang nawn leh ta a ni.

Semifinal game 2 inkhel a hmuhnawm kher mai;First quarter-ah coach cum player Mapuia'n inkhel bultan tha lo mahse forward Eddie-a leh point guard Jacob te chuan game an siam hle a; Zarkawt Serpent tan shooting guard Jonathan chu khel tha hle mahse team tan a thawh hlawk em em lo. An thawh hona that tawk loh an tuar a, first quarter a tawp chuan Khatla TBL chuan 16-12 in hma an hruai.

Second quarter-ah TBL tan Eddie, Rinpuia leh Gospel-a te an langsar hle a, forward Rinpuia chuan 3 points vawikhat a nei bawk. Serpents tan point forward Lianhmingmawia leh point guard K Lalhruaitluanga quarter hnihnaah hian an che tha a, Hmingthanmawia leh Lalnundika chuan 3 points vawi khat ve ve neiin quarter tawp dawnah point 1 in an umpha lo, 31-32 in second quarter an hmang zo.

Third quarter-ah Serpents tan Jonathan-a leh K Lalhruaitluanga an thawh hlawk hle a, K Lalhruaitluanga chuan 3 points vawi hnih neiin Robert-a hian 3 points vawi thum lai nei bawk mahse, Khatla TBL coach cum player Mapuia a rawn lut a, game a sawi danglam nghal , team chemistry nei tha an nih zia rawn lang chhuak lehin hma an hruai leh ta a, 52-46 in third quarter an hmang zo ta a ni.

Fourth quarter-ah TBL chuan hma hruai chhunzawm lehin Gospel-a leh Eddie-a te an tal buai deuh, turnover an ngah a, Mapuia'n a theihna a lan tir thei lo, defence an tight that tawk loh an tuar bawk. Serpents chuan chak ngei tumin theih tawp an chhuah thung  a, defence an rawn uluk zual a, an tangtlang a, Lianhmingmawia leh Hmingthanmawia te an thawh hlawk bakah Jonathan-a leh Robert-a ten an tawiawm tha, chak zawk tura rinkai ni tawh mahse pressure sang tak hnuaiah an hah deuh niin a lang. 

TBL tan Mapuia bawk chuan a tawnhriatte hmang tangkaiin pressure sang tak hnuaiah team a rawn khai kang chho leh a; Serpents khan rawn pawt thlain han lead hial mahse team puitling leh chemistry nei tha an nih zia langin an chi ai lo, hun a tawp meuh chuan TBL chuan 60-58 in hnehna an chang ta a ni.

Copyright © inkhel.com 2024. All rights reserved.