​MPL7 Champions Aizawl FC

18th December 2018, 05:12AM

Mizoram Premire League vawi 7 neih tawhah Aizawl FC chu vawi thum an champion ta a, anni aia champion hnem club dang an awm lo. December ni 17 zan khan AR Lammualah Aizawl FC chuan champion lai Chhinga Veng FC final-ah an hmachhawn a, hun pangngaiah 1-1 in an inhnehtawk a, extra time-ah goal a luh belh lo, penalty shootout hmanga chak zawk zawn a nih hnuah Aizawl FC chuan 5-4 in hnehna changin an champion. Aizawl FC hi MPL-ah vawi thum champion thei awm chhun an la ni.

Chhinga Veng FC 1-1 Aizawl FC 

(Romawia 73') (Alfred 39')

(Penalty shootout-ah Aizawl FC 5-4 in an chak)

Chhinga Veng FC XI: T.Zothanmawia, F. Lalnuntluanga, Hmingthanmawia, Jacob Lalrawngbawla, Lalmuansanga, Lalrinchhana, MS Dawngliana, PC Laldinpuia, Vanlalchhuanga, Vanlalzuidika, Laldinliana varte.

Aizawl FC XI: Lalawmpuia, Hmingthanmawia, Isak Vanlalruatfela, Joe Zoherliana, K. Lalhmangaihkima, Lalbiakzuala, Lalhriatrenga, Lalkhawpuimawia, Paul Ramfangzauva, Rochharzela, Alfred Kemah Jaryan

Chhinga Veng FC chuan an no mawi humhim ngei tumin a tir atangin an nawr, Dawngtea chuan chance tha lutuk a nei nghal pang, box veilam atangin a duhthusamin a pet thei lo, lei hrulah a pet out chiah chiah. Aizawl FC game a rawn dik chho tan a, chance an hmu chho ve zauh zauh. First half tawp dawn minute 6 a la awm tihin Alfred Kemah Jaryan chuan box pawn chiah chiah atangin a hlap, a goal mawi tak zet. Chhinga Veng FC chuan an siphurh rulh tumin an nawr, mahse half time a ni chhunzawm.

Second half-ah Aizawl FC game mawi mahse Chhinga Veng FC lamin an fight na hle. 73 mins-ah Chhinga Veng FC chuan an siphurh an rul ta nge nge. Set piece atanga ball tha tak chu Dawngtea chuan dawngin a thunun thei lo, he ball per hi Romawia chuan hnai set sawt atangin a pet goal ta. Hun tawp lamah Aizawl FC chuan chak theihna chance tha tak Isaac-a hmangin vawi hnih lai an nei. Box dinglam sir atanga kawh zeta Isaac-a shot chu T.Mawia'n a lo dang a, hun tawp dawn tak tak 89 mins-ah Isaac-a cross tha tak chu a goal teuh hle bawk.

Hun pangngaiah 1-1 in an inhnehtawk a, extra time khelh a ni chhunzawm. Extra time-ah pawh Aizawl FC hian goal hnih khung theihna chance an nei leh, mual veilam sirah Ansumana Kromah chuan ball mawi takin a chawk, box chhung chiah atangin a shot, Chhinga Veng FC chu goal banin a chhanhim hlauh. Hemi hnu lawk hian Isaac-a ball pek tha zet Rochharzela'n ho takin a thelh bawk.

Extra time khelh zawh a nih pawhin goal dang a lut tawh lo, 1-1 in an inhnehtawk a, penalty shootout hmanga chak zawk zawn a ni ta a. Hetah hian Chhinga Veng FC lamin chak theihna chance tha tak an nei. Ramfangzauva penalty pet chu T. Mawia'n a save a, Chhinga Veng FC lamin an pet goal-in an chak thei tawh.

Rinchhana a lo dingchhuak, a pet goal chuan an chak, mahse Aizawl FC goalkeeper Opa chuan a lo dan sak tlat mai. Panga ve vein an pet hnuah 4-4 in an inhnehtawk a, sudden death a ni ta, hetah hian Chhinga Veng FC tan Hmingtea chuan a thelh hlauh a, Aizawl FC chuan 5-4 in hnehna an chang ta a ni.

Chhinga Veng FC goalkeeper T. Zothanmawia chu Best goalkeeper-a thlan a ni a. Chhinga Veng FC defender PC Laldinpuia chu Best defender-a thlan niin an forward MS Dawngliana chu Best Forward-a thlan a ni bawk.

Goal 8 khungtu Mizoram Police FC forward Lalfakzuala chu top scorer niin; Aizawl FC chuan Fair Play Award an dawng a. Aizawl FC innghahna Alfred Kemah Jaryan chu Best Midfielder-a thlan a nih bakah Mizoram Premier League Season 7-a player tha ber atan thlan a ni bawk.

Lawmman

Champion: Aizawl FC, Rs 6,00,000/- Trophy

Pahnihna: Chhinga Veng FC, Rs 3,30,000/-

Pathumna: Mizoram Police FC, Rs 2, 20,000/-

Palina: Chanmari FC, Rs 1,60,000/-

Pangana: Electric Veng FC, Rs 1,35,000/-

Parukna: Chawnpui FC, Rs 1,10,000/-

Pasarihna: Ramhlun North FC, Rs 85,000/-

Pariatna: Bethlehem Vengthlang FC, Rs 60,000/-

Fair Play: Aizawl FC, Rs 20,000/-

Mimal Lawmman

Best Player : Alfred Kemah Jaryan, Aizawl FC, Rs 5,000/-

Top Scorer: Lalfakzuala, Mizoram Police FC, 8 goals, Rs 5,000/-

Best Midfielder : Alfred Kemah Jaryan, Aizawl FC, Rs 5,000/-

Best Defender: PC Laldinpuia, Chhinga Veng FC, Rs 5,000/-

Best Goalkeeper : T. Zothanmawia, Chhinga Veng FC, Rs 5,000/-

Best forward : MS Dawngliana, Chhinga Veng FC, Rs 5,000/-

(adsbygoogle = window.adsbygoogle || []).push({});

Copyright © inkhel.com 2024. All rights reserved.