McDowell's No1 Soda Mizoram Premier League season 6 final-ah Chhinga Veng FC chuan R. Malsawmtluanga goal khat hmangin si khat faiin I-League Champion lai Aizawl FC an hneh a, a vawi khat nan Chhinga Veng FC chu MPL champion an ni ta a ni.
MPL6 season-a league hmahruaitu Chhinga Veng FC chuan an that zia a tawp thlengin an lantir a, Aizawl FC chuan vawi thum MPL champion ni thei hmasa nih tum mahse Chhinga Veng FC chuan tun season-a lawmman hui theih zawng zawng an hui ta a ni.
Chhinga Veng FC 1-0 Aizawl FC
(R. Malsawmtluanga 5')
Chhinga Veng FC XI : Zothanmawia, Lalrinchhana, K Lalthlahlova, R Laldinliana, Hmingthanmawia, Lalrinchhana, R Malsawmtluanga, Lalrammuanpuia, MS Dawngliana, Laldampuia, Lalkhawpuimawia.
Aizawl FC XI: Avilash Paul, Lalramhmunmawia, Lalhriatrenga, Albert Zohmingmawia, Masih Saighani, William Lalnunfela, H Lalbiakthanga, Lalrinzuala Khiangte, H Lalmuankima, David Lalrinmuana, K Lalthathanga.
Inkhelh tan atanga minute ngana lekah Chhinga Veng FC chuan goal an khung. Tun season Mizoram Premier League player tha ber R. Malsawmtluanga chuan mual veilam sir atanga Dampuia cross chu top corner-ah a tauh goal. Chhinga Veng FC-in bul an tan tha hle a, game pawh an thunun chhunzawm nghal.
35 yards atanga Msa free kick chu a goal teuh kher mai, Aizawl FC goalkeeper Avilash chuan a lo nam over hman hlauh bawk. Minute 20 an khelh chhungin Msa chuan shot on targets vawi thum ngawt a nei hman a ni. Tin, Msa free kick bawk hi R. Lalthlahlova chuan box chhung atangin a lo tauh a, Aizawl FC goalkeeper Avilash chuan a lo khawih hman hlauh bawk a, ball per hian cross bar a per nghe nghe.
First half tawp dawnah Msa through ball tha zet chu Khawpuimawia chuan umin box chhung atangin a shot, Aizawl FC goalkeeper Avilash a lo up tha kher mai, a lo dang hlauh hman a ni. First half-ah Aizawl FC-in chance hlauhawm an nei hleithei lova, half chance erawh an nei, Lalbiakthanga shot chu Achia chuan box chhung atangin a lo dang per, mahse a duh aiin a khawih na lo, goal zawnah chuan kal selang chuan goal thei dinhmunah a ding a ni. H. Lalmuankima a vannei hle a, ball a out tawh hnuah Chhinga Veng FC left back Hmingtea a titlu, referee-in a lo hmu chiang chiah lova, card chawi lovin a chhuak hlauh mai.
Second half-ah Aizawl FC chuan an nawr na hle a, hetih lai hian Chhinga Veng FC lamin chance an nei zauh zauh bawk. Dampuia chuan chance tha tak a nei, mual veilam sir atangin box chhungah ball a lalut, box chhung atangin a shot, Aizawl FC goalkeeper Avilash chuan a lo dang. Aizawl FC chuan goal khung an mamawh tih an inhriat avangin Fela Zote an dahlut a, an nawr a na sawt.
70 mins-ah box pawn atangin David Rinmuana chuan kawh zetin a shot, Chhinga Veng FC goalkeeper T. Mawia chuan a lo save, hemi hnu lawka corner atanga ball kal zel chu Masih Saighani chuan pen nga vel lek atangin a shot, T. Mawia zawn tak a ni a, Chhinga Veng FC an him hram.
Aizawl FC chuan hun tawp dawn minute 8 a la awm tihin penalty an hlawhchhuak dawn emaw an ti, box chhungah Hmingtea chuan William-a a titlu, referee chuan penalty a ham lo hlauh. Hemi hnu lawk hian H. Lalmuankima chuan box pawn atangin kawh zetin a shot leh, T. Mawia chuan a lo dang leh. Hun tawp dawn tak tak added time-ah an buai deuh nak nak a, William Lalnunfela chu hnawhchhuah a ni hlauh mai.
Hunin a daih ta lo, si khat faiin Chhinga Veng FC chuan hnehna an chang ta a, a vawi khat nan Mizoram Premier League Champion an ni ta a ni. Chhinga Veng FC midfielder R. Malsawmtluanga chu Best midfielder leh Best player atan thlan a ni a, a phu hle nghe nghe a ni. MPL Season 2-a Best player Malsawmtluanga hian tum 4 ngawt Man of the Match lawmman a dawn bakah goal 5 thunin Chhinga Veng FC Champion-na goal pawimawh tak hi chung zingah pawh chuan a tel nghe nghe a ni.
Top scorer hi Mizoram Police FC striker Lalfakzuala niin goal 10 a khung a, best goalkeeper hi Chanmari FC goalkeeper F. Lalmuanawma niin clean sheet vawi 4 a nei. Tin, Chhinga Veng FC defender R. Laldinliana chu best defender atan thlan a ni bawk. Aizawl FC forward H. Lalmuankima chu best foward-a thlan a ni a, Bethlehem Vengthlang FC chuan fair play award an dawng bawk a ni.