01 Jul 2016 01:14

Inkhel

Mizo Sports Website hmasa ber

​MPL5 Champhai lamah

Mizoram Premier League Board leh MPL club-te chu vawiin (June 30) khan Grand Hotel, Aizawlah an thukhawm a, MPL Board thurel tawhte an thlirhoa an sawi tlan bakah MPL5 inkhelh hun turte an ruat fel.

MPL Board chuan September 1, 2016-ah MPL5 hi khelh tan turin a rel a, December 16-a final tura duan a ni. MPL4 ang thoin team tinte vawi hnih theuh an inkhelh kual hnuah a sang paliin semi final an khel ang.

Semi final hi double legged-a khelh tur a ni a, away goal rule hman a ni lo ang a, inkhel pahniha inhnehtawk chuan penalty shootout hmanga chak zawk zawn tur a ni ang. Vawi hnih inkhelh kual zawh hnua point hmu sang ber leh palina inkhelin pahnihna leh pathumnain semi final an khel ang. Final hi single leg-a khelh tur a ni. Kar khata round khat zel khelh hi duhthusam ni mah se, December-a zo hman turin hunin a daih lo a, tum thum chu kar khatah vawi hnih khelh a ngai ang.

Mizoram hmun hrang hrangah MPL a lo darh zau zelna tur leh, mipuiin a hmun ngeia MPL an en theihna turin MPL Board chuan ruahmanna thar a siam a, Champhaia Chhangphut Field-ah MPL5-a Round 7 chu nghah tuma ruahmanna siam a ni. Tuna duan lawk ang chuan October 6&7, 2016-ah Round 7 khelh tur a ni a, Champhaiah MPL club zawng zawng an zin ang. MPL Board lamin team (match day squad leh coaching staff) te kal leh haw man, an cham chhung (ni 3) senso a tumsak ang.

MPL5 Kickoff hi August 30, 2016-ah neih tur a ni. MPL Kickoff-ah hian player leh coaching staff bakah club hotute a kim thei ang bera kal tura ngen leh hriattir an ni. MPL5 Kickoff hun hmang turin state pawn lam atangin mi pawimawh chah tum a ni.

MPL5-a junior inelna hi Under 18-a kalpui tur a ni. 1.1.1998 leh a hnu lama piang chin tan khelh theih a ni ang. Player-te’n birth certificate dik tak an nei tur a ni a, an birth certificate hi an pian kum atanga kum thum chhunga ziah luh (register) a ni ngei tur a ni. August, 2016 chhungin MPL Under 18 registration hi tihfel tur a ni a, October, 2016 atangin khelh tan a ni ang.

Club pariatte vawi khat theuh an inkhelh kual hnuah a sang paliin semi final an khel ang a, chumi zawkah final an khel zui ang - hei hi single leg-a khelh ve ve tur a ni ang.

MPL Under 18-te ziah luh dawn hian club danga khel mek player-te pawh ziah luh theih an ni a; nimahsela an club lam phalna neih tur a ni a, hei hi transfer pangngai ang ni loin MPL junior inkhel tur atan chauh a ni. MPL-ah hian MPL Under 18 player-te khelhtir theih an nihlaiin club dang atanga ziah luh Under 18 player-te erawh MPL-ah an khel thei lo ang. MPL Under 18 hi football-a rawlthar zawkte hmasawn zelna atana buatsaih a nih vangin a registration pawh hi tihdanglam bik a ni - hei hi chu MPL-a kalpui dan pangngai a ni e.

MPL5-ah hian club tinin group match-ah ticket 100 zel inkhelh dawn apiangin an dawng ang a, ticket lut atanga 35% ve ve (70%) hi club lamin an dawng ang a, MPL Board-ah 30% a lut ang. Ticket hi Rs 30/- man a ni ang a, school naupang uniform ha tan Rs 10/- a ni ang. Semi final-ag Rs 50/- niin Final-ah Rs 100/- a ni ang.

Mizoram Premier League Season 5 Fixtures : Click Here