26 Aug 2015 07:38

PC Lala

inkhel correspondent and photographer

MPL Season 4 Kick Off neih a ni

Mc Dowell's No.1 Soda Mizoram Premier League Season 4 Kick Off chu August 25, 2015 Thawhlehni zan dar 8:00 khan Lalthanhawla Auditorium, Aizawlah neih a ni a. MPL club te, Match Officials, MPL Board leh MFA hruai tute an kal tha hle.

K.Vanlalruata host-na hnuaiah Kick Off hun hi hman a ni a. Tunlai Mizo Idol atanga kan hriat lar Thawhlehnaniropuia leh Rachel Lalnunkimi ten zaiin kalkhawm te min awi bawk.

Pu Lalthanzara, MFA Senior Vice President hnen atangin thusawi ngaihthlak a ni a, MPL season 4 neih theih na tur atan leh thalai ten fooball atanga sum an hmuhna tur atana mi inphal te an la awm zel avanga lawmawm a tih thu sawiin, MPL tan tirh atangin hmasawnna nasa tak football-ah kan neih thu leh Aizawl FC ten I League hial an khelh theihna bul chu MPL kan neih vang a ni a ti. Football-ah eizawnna a awm  zia a takin, Mizo tlangval ten an tawn mek thu leh AIFF leh FIFA lam ten Mizo thalaite Football-ah hma an sawn zelna tur an ngaihtuah thu te sawiin, MPL Season 4 neihna tur atana inelna thianghlim tak nei turin duhsakna a hlan bawk.

Club tin Model ten club jersey theuh an rawn pho lan hnuah, club tin aiawh player pakhat theuh lokal chhuakin, Pu Lalbiakzuala, MFA Asst. Secretary chuan thutiam (Oath taking) a neih pui hnuah, club tin aiawh te chuan hming sign-na an nei zui nghal bawk. MPL Hand book tlangzarhna hun hman zui nghal a ni a, Hand book hi Zonet lam atangin Tato-a chuan a tlangzarh.

MPL season 4 Kick Off hun hman leh a ni a. kumin ah hian, mipa leh hmeichhe naupang in Kick Off-na hun an nei thung. Pu Lalnghinglova Hmar, MFA Honorary Secretary hnen atangin thusawi ngaihthlak zui a ni a. Kick Off tu atana Grassroot naupang leh Sub-Junior champion team naupang hman a nih chhan sawi fiahin, FIFA in Aizawl an rawn tlawh khan Mizoram tan thil pali an rawn chhawpchhuak a, grassroot kalpui zel tur a nih bakah kum 14-15 atan Youth football inelna kalpui tur a nih thu leh technical expert min pek thu te, sum leh pai leh tul dang zawng zawng an rawn tum tur thu te, Hmeichhia ten football-ah hmasawnna an neih zelna atan te, Coach leh Referee te hmasawn zel na atan thil tul zawng zawng an tum tur thu sawiin, Mizo thalai te a tam thei ang ber fooball hmanga eizawnna nei tur in leh ram leh hnam tih hmingthat nan football chu hmang tangkai  zel turin fuihna thu a sawi bawk.

MPL season 4 ah hian kalphung tidanglam hretin, Semifinal hi a sang pali ten an khel tawh dawn a. 1-na leh 4- na,  in tum in,  2-na leh 3-na an in tum thung ang a. Team tin te vawihnih theuh inkhel kual chhuak vekin, semifinal-a a chak team hnih hian Final hi vawi khat chiah an khel dawn a ni a ti.

MPL Season 4, 2015

(adsbygoogle = window.adsbygoogle || []).push({});