Mizoram Premier League (MPL) Season 8 Round 6 chu Kolasib khawpuiah nghah a ni dawn. October ni 18&19, 2019-ah Kolasib District Football Association chuan he inkhel hi a thleng dâwn a ni.

MPL hi Season 5 atangin Aizawl pawnah Round khat khelh chhuah thin a ni. MPL 5 hi Champhai lamah khelh a ni a, MPL 6 inkhel hi Lungleiah nghah niin MPL 7 hi Serchhip khawpuiin a thleng tawh bawk a, MPL 8 hi Kolasib lamin an thleng ve thung ang.

Kolasib District Football Association president Vanlalsawma chuan, "Kolasib khawpuia MPL inkhel nghah a ni tur hi kan lawm a, kan phur tawh khawp mai. KDFA-in a tha thei ang bera thlen kan tum dawn a, Kolasib mipui mai ni lo, kan district chhunga mipui zawng zawng inkhel en turin kan sawm lawk duh a ni," a ti.

MPL Board Chairman PC Vanlalhruaia chuan,"MPL hi Mizoram hmun hrang hranga khelh hi kan duh a, kan sum neih milin round khat zel hi Aizawl pawnah kan khel thin. Player-te hi Mizoram kil tin atanga kal khawm an nih angin Mizoramah hian a zau thei anga inkhelh kual hi kan duh dan a ni a, sum kan neih ang zelin kan inzar pharh chho zel ang, "tiin a sawi.