September ni 14, Ningani tlai Mizoram Premier League Season 6 Round 3 inkhelah Chanmari FC chuan 4-1 in Mizoram Police FC an sawp a, he inkhelah hian Thasiama Chanmari FC winger chu Man of the Match-ah thlan a ni.

Goal lut te hi second half-a lut vek an ni a, Chanmari FC tan Rochhingpuia, Vanlalbiaa Chhangte, Joe Zoherliana leh Lalmuanzova te chuan goal khat theuh an khung a, Mizoram Police FC tan Lalsangbera chuan goal khat a khung ve bawk.

Chanmari hian inhliam vangin keeper Lalmuanawma leh Lalmuanzova chuan inkhel bul an tan lo a, hrem vangin Jakob Vanlalhlimpuia inlan thei lo mahse, Rochhingpuia leh Liberian striker Alex Whittemore chuan inkhel bul tanin hnehna an chang leh ta a ni. 

Mizoram Premier League (MPL) Season 6 Round 3-ah Chanmari FC leh Mizoram Police FC hian match thum ve ve an khel tawh a, Chanmari FC hian Dinthar FC an hneh hnuah Aizawl FC nen anin hneh tawk a, Mizoram Police FC hneh leh in khelh tawhah point 8 neiin hmahruaitu an ni.

Police striker F Lalrinpuia (Valpuia) hian tun season match thum khelh tawhah goal hnih a khung tawh a, a mah thlawp turin Lalfakzuala leh Lalbiakhlua ten inkhel bul tan mahse, Chanmari FC hmaah an mualpho thung. Police hian Chhinga Veng FC an hneh loh hnuah Bethlehem VT nen anin hneh tawk  a, Chanmari hneh lo leh in khelh tawhah point 1 an nei thung.

Chanmari FC 4-1 Mizoram Police FC

(Rochhingpuia 48', penalty, Vanlalbiaa Chhangte 58', Joe Zoherliana 60', Lalmuanzova 90+1') (Lalsangbera 66')

Chanmari FC XI: C Lalrosanga, MS Dawngliana, Rochhingpuia, Joseph Lalnunpuia, Vanlalbiaa Chhangte, Thomas Lalengkima, Thasiama, Lalmuanzuala, Joe Zoherliana, Joseph Lalfakzuala, Alex Whittemore.

Mizoram Police FC XI: Lalfakawma, Lalhmunmawia, Lalbiaknunga, Lalfakzuala, Lalramtharmawia, F Lalrinpuia, T C Vanlalhruaia, Laltanpuia Ralte, V Laltanpuia (Tri-a) Lallawmzuala, Lalbiakhlua.

Inkhel tan a ni a, team pahnin te anin nawr tawn zak zak hnuah  Police chuan goal thunna hun tha nei hmasa zawkin Fakzuala goal shoot tha zet leh Valpuia freekick chu Chanmari keeper Msa chuan a dan sak a, Tri-a chuan goal thunna hun tha a hlah.

Chanmari tan Muanzuala leh Thasiama chuan goal thunna huntha nei ve ve mahse, Police keeper Tpa tan hna hautak an siam lo. First half hun tawp dawnah Coach Thlanga'n PC Zosangliana luh tirin an goal nawr na sawt mahse, Mabiaa leh Thasiama chuan goal thunna hun tha an hlah.

Second half-ah goal nga lai a lut a, tan a tang a, minute 3 aral hmain Chhinga chuan a pet goal a, he goal hi Liberian striker Alex Whittemore penalty hlawh chhuah a ni.

Chanmari chuan nawr chhunzawmin minute 58-ah mual veilam sir a tang a Mabiaa goal shoot tha zet chu Police keeper Tpa  vei lamah mawi zetin a goal thung.  Minute 2 aral leh hmain Joe Zoherliana chuan an goal thumna a tan a khung zui leh nghal zat bawk.

Police chuan an siphurh sut ngei tumin coach Tialthawnga chuan Sangbera a rawn luh tir a, Minute 66-ah Sangbera chuan an goal khatna a rawn thun zui nghal nghe nghe a ni. Police chuan nawr chhun zawmin  Biaktea chuan goal thun belhna hun tha a hlah thung.

goal a luh belh dawn tawh lo emaw tih hnu hun tawp dawn added time-ah mual dinglam sir a tang a mabia ball vawrh luh tha zet chu bench a tang a lut Muanzova chuan cool takin a pet goal leh a,  Chanmari chuan 4-1 in hnehna an chang ta a ni.

Chanmari FC hian September ni 19, Thawhleh zan dar 7:30-ah Ramhlun North FC an hmachhawn leh ang a, Mizoram Police FC hian September ni 18, Thawhtan zan dar 7:30-ah Dinthar FC an hmachhawn thung ang.

(adsbygoogle = window.adsbygoogle || []).push({});