MPL-ah AIFF CRS hmang dawn

18th August 2019, 01:08AM

Mizoram Premier League Season 8 chu September 5 hian tan a ni dawn ta, a vawi khatna atan All India Football Federation-in player inziah luhna a duan Centralised Registration System hman a ni dawn.

Hei vang hian FIFA-AIFF transfer window angin August 31 thleng MPL-a player ziah luh hun pawh sei a ni a; hetihlai hian October-a MFA-in transfer hun a hawn thin chu MPL-ah hian hman theih a ni tawh lo ang.

CRS chu eng nge

AIFF chuan CRS hi kum 2015 khan a kalpui tan a, football player zawng zawng inziah luhna tur 'software' a ni ber mai - player-te fel taka chhinchhiahna a ni.

ISL, I League leh AIFF hnuaia national championship khel tawh player-te chu CRS-ah hian ziah luh vek an ni tawh. Player khelhna club, an contract hlut zawng leh rei zawng, pian kumte leh nihna chiang taka chhinchhiah vek a ni.

CRS-a ziah luh player chu awlsam takin chhui zung zung theih an ni a, kum dik loa khelh leh hmun hrang hranga inziah luh (dual registration) tumte pawh a veng thei ang.

MPL-ah CRS

AIFF-in mumal taka football kalpuina state thenkhatah CRS hi kalpui hmasak tur a ti a, chumi zingah chuan Mizoram pawh a tel. Tun hnaiah AIFF Registration Workshop chu Mizoramah buatsaih a ni a, MFA chu CRS kalpui tura tih a ni ve ta.

State pumpuia registration kalpui dan thlak thut a, vawi leh khata CRS-a luh rup chuan harsatna tam tak a thlen theih dâwn avangin, MFA lam ngenna angin AIFF chuan CRS chu MPL8 a bul tan phawt a phalsak.

MFA Executive Committee Meeting-in ngun takin a ngaihtuah a, MPL club-te nen sawiho a nih hnuah MPL8 atangin CRS kalpui tura tih a ni ta.

CRS nghawng

MPL8 player-te chu CRS ah an hming a chuang vek dâwn a, khawi hmun atang pawhin tute nge an nih awlsam taka en theih a ni tawh ang.

Chutihlaiin CRS-a player ziah luh chu FIFA-AIFF transfer window chhungah chiah transfer phalsak a ni tawh. Tunah hian transfer hun hmasa chu June 9 -August 31 a ni a, hei hi MPL lam pawhin an zawm nghal a ngai a, August 31 thleng player ziah luh belh theih a ni.

Transfer hun inhawn leh hun chu January, 2020 chiah a nih tawh avangin kum danga hman thin MPL second phase khelh dawna transfer (October transfer window) chu MPL8 ah chuan a theih dâwn tawh lo a ni.

CRS thatna leh harsatna

CRS-a player ziah luh loh, CRS number nei lo player tan state pawna inkhelh theih a ni tawh lo a, state pawna chhuah a theih tawh loh a, CRS hman a nih chuan he harsatna hi a bo ang.

CRS-a inziak lut tawh player chu a khelh tawhna leh a chanchin chiang takin software-ah record vek a ni tawh.

CRS hman a nih a, chumi kalpui Competition Management System (CMS) hman a nih tel phei chuan player-te inkhelh zat, card hmun dan, goal thun zat zawng zawngte chhinchhiah fel vek a ni a, AIFF in a record a kawl vek ang. MPL8-ah pawh CMS hi hman theih dan zawn mek a ni.

Dual registration a veng a, tun hmaa state pawna lut chhuak reng, registration mumal lo tak ang kha a bo tawh ang. Player inchuh vanga buaina pawh pumpelh a ni tawh ang.

Transfer kalphung a thlak danglam vek thung dawn, Mizoram foootball season mila transfer hun hawn thinte a nghawng dawn. FIFA-AIFF transfer window zawm ve a ngai tawh dâwn a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.