Zote Hoda Mizoram Premier League (MPL) Season 9 Round 4 match hmasa zawk chu September ni 22, Ningani khan khelh a ni a, inkhel vawihnih awmin inkhel hmasa zawk Mizoram Police FC chuan sikhat faiin Aizawl FC an hneh a, inkhel hnuhnung zawkah FC Venghnuai chuan sihnih faiin Chanmari FC an hneh ve bawk. 

Mizoram Police FC hian match li khel tawhin point 8 an nei tawh a, table-ah pahnihna an ni mek a ni. Aizawl FC hian match li atangin point 9 neiin hmahruaitu an ni mek bawk.

Inkhel hnuhnung zawk FC Venghnuai tan C Ramnunpuia leh Lalrammuanpuia chuan goal khat ve ve an khung. FC Venghnuai hian match li khel tawhin point 5 an nei ve mek bawk. Chanmari FC hian match li atangin point 6 an nei mek a, table-ah pahnihna anla ni ve mek bawk.

4:00PM Mizoram Police FC 1-0 Aizawl FC

(Malsawmfela 72')

Mom: Malsawmfela, Mizoram Police FC

Team pahnih te an fimkhur dun hle a, inkhel thunun zawk awm lo a, an innawr tawn zak zak hnuah Mizoram Police FC forward Talea chuan a hun tha neih a hmang tangkai thei lo. Aizawl FC forward Dindina pawhin goal thunna hun tha nei ve bawk mahse a hmang tangkai thei bik lo a, Dindina ball pek tha zet chu Hmangaihkima chuan box-ah lalutin Police keeper Muanawma chiah a hmachhawn hnuah Muanawma chuan a dan sak.

First half huntawp dawnah Talea'n goal arc pawn chiah a tanga a shot tha zet chu Aizawl FC keeper Hruaia chuan adan sak a, goal lut awmlo in hun chanve an hmang zo ta a ni.

Second half-ah Coach Lalbiaksanga Colney (Bsa) chuan Sawmfela luh tirin an bawl bawh a na sawt a, an hun tha neih an hmang tangkai zui bawk. Minute 72-ah Valpuia freekick tha zet chu box a awm Sawmfela chuan tauh lutin an hmahruaina a khung. \

Mizoram Police FC chuan inkhel thunun zuiin goal thun belhna hun tha Sawmfela leh Fakzuala chuan nei zui mahse gaol erawh an khung belh thei tawh lo. Aizawl FC pawhin an siphurh hi huntawp thlengin an sut thei tawh lo a, Mizoram Police FC chuan 1-0 in hnehna an chang zui ta a ni.

7:00PM FC Venghnuai 2-0 Chanmari FC 

(C Ramnunpuia 66', Lalrammuanpuia 72' (P)

Mom: C Ramnunpuia, FC Venghnuai

Inkhel hnuhnung zawkah FC Venghnuai chuan 2-0 in Chanmari FC an hneh. Goal lut te hi second half a lut ve ve an ni a, FC Venghnuai tan C Ramnunpuia leh Lalrammuanpuia chuan an khung a ni. Chhumzing avangin inkhel minute 15 vel zet chawlh lailawk a ni bawk.

Inkhelh tan a ni a, FC Venghnuai chuan inkhel thunun zawkin hun tha an nei nghal a, forward Malsawmzela ball pek tha zet Hruaisanga'n goal arc chhung chiah a tanga a shot chu Chanmari FC keeper Rinzuala chuan adan sak hnuah Hruaisanga chuan goal thuna hun tha nei zuiin a hmang tangkai thei lo zui a, goal lut awmlo in hunchanve an hmang zo zui ta a ni.

Second half tan a ni a, chawlh lawk hmang tha zawk FC Venghnuai chuan annawr nghal. minute 66-ah FC Venghnuai chuan goal hmahruai an khung. He goal hi mual veilam sir a tangin Ramnunpuia chuan mawi takina khung.  Minute 6 a ral leh hmain FC Venghnuai chuan penalty an hlawh chhuak zui a, Lalrammuanpuia (Apuia) rawn pen chhuakin an goal hnihna a khung.

Chanmari FC chuan an siphurh sut ngei tumin nawr let bawk mahse forward Hriata leh K.Mama ten ball tha an insiam thei lo. Huntawp dawnah buaina a chhhuak tah hian Chanmari FC midfielder C Lalhunmawia leh FC Venghnuai Defender Lalruatfela chu hnawh chhuah an ni zui bawk.

Chanmari FC chuan an siphurh sut ngei tumin annawr zuia huntawp dawnah Tluangtea chuan C Venghnuai keeper Ramchhana chiah a hmachhawn hnuah Ramchhan chuan a dan sak a, goal luh belh tawh lo in FC Venghnuai chuan 2-0 in hnehna an chang zui ta a ni.