Zote Honda Mizoram Premier League (MPL) Season 9 Round 10 chu October ni 3, 2022 (Ningani) khan AR Lammualah khelh a ni a, inkhel vawhnih awmin inkhel hmasa zawk Electric Veng FC chuan 2-0 in Chanmari FC an hneh a, inkhel hnuhnungah FC Bethlehem leh FC Venghnuai te goal awmlo in an inhneh tawk.
11:30AM Electric Veng FC 2-0 Chanmari FC
(Jonathan Lalrawngbawla 66', Vanlalremkima 90+3')
Mom: Vanlalremkima, Electric Veng FC
Inkhel hmasa zawkah Electric Veng chuan sihnih faia Chanmari FC hnehin poin 3 hlu tak an hlawh chhuak. Gol lut te hi second half a lut an ni a, Electric Veng tan Jonathan Lalrawngbawla leh Vanlalremkima (Tetea) chuan goal khat ve ve an khung.
Electric Veng hian khelh sawm atangin point 9 an nei a, table mawngphah chhuahsanin parukna an ni ta a ni. Chanmari hian point 7 an nei ve mek bawk a, table-ah pasarihna an ni bawk.
Inkhel tan a ni a, team pahnih te an fimkhur dun hle. Goal hlauhawm hmuh tur a tam lo. An innawr tawn ak zak hnuah Chanmari chuan goal thunna hun tha nei hmasa zawk mahse forward Hriata leh Mka shot tha zet chu a goal dawn emaw tih hnuah Electric Veng keeper Hriata chuan a dan sak ve ve.
Electric Veng pawhin goal thunna hun tha nei ve bawkin midfielder Vanlalremkima'n box pawn chiah a tanga a shot tha zet chu a goal dawn nia alan laiin goal kham aper a, Mawitea'n Chanmari keeper Rinzuala chiah a hmachhawn hnuah goal sirah apet zui bawk. Goal lut awm lo in hun chanve an hmang zo zui ta a ni.
Second half tan a ni a, chawlhlawk hmang tha zawk Electric Veng chuan minute 66-ah an hun tha neih an hmang tangkai ta. Defender Puipuia ball pek tha zet chu Jonathan Lalrawngbawla chuan box-ah lalutin an hmahruaina a khung.
Electric Veng chuannawr chhunzawmin goal thun belhna hun tha an nei zui leh a, bench a tanga lut forward Mapiana shot tha zet chu Chanmari keeper Rinzuala chuan a dan sak hnuah Puipuia chuan goal kham a tauh per bawk.
Electric Veng chuan 1-0 in hnehna an chang tawh dawn emaw tih hnu huntawp dawn injury time-ah Vanlalremkima (Tetea) chuan freekick a tangin mawi takin an goal hnihna a khung a, huntawp zui ta a ni.
2:30PM FC Bethlehem 0-0 FC Venghnuai
Mom: JH Remlala, FC Bethlehem
Inkhel hnuhnungah FC Bethlehem leh FC Venghnuai te goal awmlo in an inhneh tawk a, point 1 ve ve an hlawh chhuak. FC Bethlehem hian khelh sawm atangin point 7 neiin table mawngphah an luah lum rih a, Electric Veng hian point 7 neiin table-ah parukna an ni bawk.
Inkhel tan a ni a, team pahnih te hnehna chan zawk tumin innawr tawn viau mahse goal hlauhawm erawh hmuh tur a tam lo a, chungnung zawk an awm hlei thei lo.
Venghnuai chuan hun tha nei hmasa zawkin forward Valpuia'n chuan box pawn chiah a tanga a shot tha zet chu Bethlehem keeper Chawia chuan a dan sak.
Bethlehem pawhin hun tha nei ve bawkin forward Isaka'n box pawn chiah a tanga a shot chu goal kham chungah chiah a kal zui bawk.
Huntawp dawnah Venghnuai chuan hun tha neiin forward Hruaisanga chuan Bethlehem keeper Chawia chiah a hmachhawn hnuah goal kham chungah a pet.
Second half-ah pawh goal hlauhawm hmun tur a tam lo. Team pahnih te an innawr tawn leh zak zak a, Venghnuai midfielder Tea Chinzah chuan vawihnih goal thunna huntha nei mahse a hmang tangkai thei lo.
Bethlehem forward Isaka leh Biakdika te shot tha zet chu Venghnuai keeper Ramchhana chuan a dan sak ve ve bawk.
Huntawp dawnah Bethlehem chuan goal thunna hun tha neiin Biakdika'n box pawn chiah a tanga a shot tha zet chu a goal dawn nia alan laiin Venghnuai keeper Ramchhana chuan a dan sak a, goal lut awmlo in khelmual an chhuah san ta a ni.