Inkhel

MPL 9 Champion Chawnpui FC

07th December 2022, 09:12AM

Zote Honda Mizoram Premier League (MPL) Season 9 December ni 06, 2022 (Thawhlehni) zan khan final khelh a ni a, FC Venghnuai leh Chawnpui FC te hunpangngaiah 2-2 in an inhnehtawk a, extra time khelh a ni leh a, hetah hian goal a luh loh avangin penalty-ah Chawnpui goalkeeper Lawmzuala'n midfielder Ruatfela (Rf-a) pet a dan sak a, 5-3 in Chawnpui FC chuan hnehna an chang a, a vawikhat nan an champion ta a ni.

7:30PM FC Venghnuai 2-2 Chawnpui FC

(Vanlalthanga 45+6', H Lalrempuia 59') (MC Malsawmzuala 16', Joel B Lalramchhana (OG)29')

(Penalty shoutout-ah Chawnpui 5-3 in an chak)

RG Stadium, Mualpuiah team pahnih te inkhel a hmuhnawm a, Chawnpui hian first half-ah Mc-a leh Venghnuai keeper Joel-a own goal-in hmahruai mahse, huntawp dawn injury time-ah Vanlalthanga chuan an siphurh a sut then a, second half-ah Venghnuai tan Lalrempuia chuan an siphurh an sut. Extra time-ah goal lut a awm lo a, penalty shootout-a chak zawk zawn a nih hnuah Chawnpui chuan hnehna an chang ta a ni.

First half-ah Chawnpui chungnung zawkah tangin an nawr nghal a, hun tha anneih an hmang tangkai nghal minute 16-ah defender Teka corner pet tha zet chu box a awm Best forward leh Top scorer a thlan Mca chuan tauh lutin an hmahruaina a khung. Chawnpui chuan nawr chhunzawmin an hun tha an neih an hmang tangkai zui leh a, minute 29-ah Mca freekick pet tha zet chu Venghnuai keeper Joel-a chuan a namchhuak zo lo. Chawnpui chuan an goal hnihna an thun ta a ni.

Venghnuai an beidawng lo. Goal thun ngei tumin annawr let ve bawk. Huntawp dawn injury time-ah Captain Vanlalthanga'n freekick atangin an siphurh a sut then a, Chawnpui chuan 2-1 a hmahruaiin chawlhlawk an hmang zui ta a ni.

Second half tan a ni a, chawlhlawk hmang tha zawk Venghnuai chuan hun tha annei nghal. Vanlalthanga ball pek luh tha zet chu box a awm defender Rempuia chuan goal-ah chan tirin an siphurh a sut ta a ni. Venghnuai chuan nawr chhun zawmin goal thunna hun tha bench a tanga lut defender C Nuna chuan nei mahse a hmang tangkai thei lo a, Rempuia chuan goal kham a petper zui bawk.

Chawnpui pawhin goal thunna hun tha nei ve bawkin bench a tanga lut midfielder Danny leh defender Msa chuan an hun tha neih an hmang tangkai thei bik lo a, goal luh belh tawh lo in 2-2 a inhneh tawkin hunpangngai an hmang zo ta a ni.

Extra time khelh a ni a, team pahnih te innawr tawn zak zak mahse goal hlauhawm hmuh tur a awm lem lo a, penalty an pet ngei dawn nia alan hnuah team pahnih te hian keeper an thlak ve ve a, goal luh belh lo in huntawp an hmang zui. Penalty shootout hmangin chak zawk zawn a ni a, Chawnpui tan a pet ten goal an thun vek hnuah Venghnuai midfielder Rf-a pet chu Chawnpui keeper Simon-a chuan a dansak a, Chawnpui chuan 5-3 in hnehna an chang ta a ni.