Mizoram Premier League (MPL) Season 8 Round 2 September ni 13, Zirtawpni ni tlai Chawnpui FC leh Ramhlun North FC inkhelah Ramhlun North FC chuan 3-0 a Chawnpui FC hnehin point 3 hlu tak an hlawh chhuak. He inkhelah hian Ramhlun North FC forward Jessy Vanlalmuana chu Man of the match-ah thlan a ni.

Ramhlun North FC XI

Team pahnih te hian round 1-ah an chak lo ve ve a, AIFF Centralised Registration System (SYS) hman anih avangin team pahnih te hian harsatna an tawk mek a, player an that dan berin an khel thei lo ve ve mahse Ramhlun North FC chuan team tha zawk an nih lantirin hnehna an chang. Ramhlun North FC hian khelh tawhah point 3 an nei tawh a, table-ah pathumna an ni mek. Chawnpui FC hian point anla nei lo a, a mawngphah an la luah lum rih a ni.

04:00 PM Chawnpui FC 0-3 Ramhlun North FC

(Jessy Vanlalmuana 4', Kaleba Lalnunhlima 12', Lalthankhuma 87')

MoM: Jessy Vanlalmuana, Ramhlun North FC

Chawnpui FC XI

Inkhel tan a ni a, Chawnpui FC chuan nawr nghalin goal thunna hun tha nei nghal a, box pawnchiah atanga Thlamuana shoot tha zet chu a goal dawn nia alan laiin Ramhlun North FC keeper Eddie-a chuan a dan hman hlauh. Ramhlun North FC chuan an hun tha neih hmang tangkaiin minute 4-ah box-ah forward Jessy Vanlalmuana chuan ball tha hmuh chu goal-ah chan tirin an hmahruaina a khung.

Chawnpui FC chuan nawr letin minute 6-ah freekick atangin midfielder Lalhmachhuana chuan an siphurh sutna khung mahse referee-in offside a ham hman hlauh. Ramhlun North FC chuan minute 12-ah annhun tha neih hmang tangkaiin mual dinglam sir atanga Jessy-a ball pek tha zet chu Kaleba Lalnunhlima chuan box-ah lalutin an goal hnihna a khung leh ta a ni. Chawnpui FC chuan an siphurh sut ngei tumin annawr let a, Moody Lalawmpuia, Thlamuana leh Jerry F Zonunsanga te chuan Ramhlun North FC tlanghnung an paltlang thei lo a, Ramhlun North FC chuan 2-0 a hmahruaiin chawlhlawk an hmang ta a ni.

Second half-ah ruahsur avangin team pahnih an fimkhur dun a, goal hlauh hmuh tur a tam lo bawk. Minute 16 an khel hman tihah chhumzing avangin minute 2 inkhek chawlh lailawk a ni. Inkhel tan anih hnuah Ramhlun North FC chungnung zawkah tangin forward Jessy-a chuan goal thun belhna hun tha a neih hmang tangkai thei lo mahse, huntawp dawn minute 3 ala awmin Defender Lalnunzira corner pet tha zet chu box chhunga awm Kaleba Lalthankhuma chuan tauh lutin an goal thumna akhung chu Chawnpui FC chuan huntawp thlengin an siphurh hi an sut thei tawh lo a, Ramhlun North FC chuan 3-0 in hnehna an chang ta a ni.

October ni 3, Ningani zan dar 7:00-ah Chawnpui FC hian Electric Veng FC an hmachhawn ang a, Ramhlun North FC hian October ni 4, Zirtawpni zan dar 7:00-ah FC Venghnuai an hmachhawn ang.

(adsbygoogle = window.adsbygoogle || []).push({});