Mizoram Premier League (MPL) Season 8 Round 1 match hmasa ber September ni 6, Zirtawpni tlai Mizoram Police FC leh Chawnpui FC te inkhelah Mizoram Police FC chuan 2-1 a hnehna changin point 3 hlutak an hlawh chhuak.
He inkhelah hian Mizoram Police FC defender Lalhmunmawia chu Man of the match-ah thlan a ni.
MFA Super Cup champion Mizoram Police FC hi Coach Lalbiaksanga Colney chuan a enkawl a, kumin MPL-ah champion ngei an tum a, an match hmasa berah an chak nghal.
Goal lut te hi first half leh second half-a lut an ni a, Mizoram Police FC tan Lalrinpuia leh Lalhmunmawia chuan goal khat ve ve an khung a, Chawnpui FC tan C Lalremruata chuan goal khat a khung ve bawk.
Mizoram Police FC 2-1 Chawnpui FC
(F Lalrinpuia 14', Lalhmunmawia 49') (C Lalremruata 74')
MoM: Lalhmunmawia, Mizoram Police FC
Match Report
Inkhel tan a ni a, Mizoram Police FC chuan inkhel thunun nghal mahse, Chawnpui FC chuan goal thunna hun tha an nei hmasa zawk a, Zachhingpuia ball pek tha zet chu box-a awm Thlamuana chuan a pet goal dawn nia a lan laiin Mizoram Police FC keeper Tanpuia chuan a dan sak a, mual dinglam sir atanga Lallawmsanga ball pek Lalsangpuia shoot tha zet chu Mizoram Police keeper Tanpuia chuan a dang bawk.
Mizoram Police FC pawhin goal thunna hun tha an neih hmang tangkaiin minute 14-ah Lalbiakhlua (Biaktea) ball pek tha zet chu box a awm F Lalrinpuia (Valpuia) chuan goal-ah chantirin an hmahruaina goal a khung. Mizoram Police FC chuan nawr chhunzawmin goal thun belhna hun tha nei zuiin Fakzuala chuan a hun tha a hmang tangkai thei lo.
Chawnpui FC pawhin an siphurh sutna hun tha neiin Thlamuana leh bench atanga lut Lalremkima chuan an hun tha an hloh a, goal luh belh lo in Mizoram Police FC chuan 1-0 a hmahruaiin chawlhlawk an hmang.
Second half-ah goal hnih a luh belh a, Mizoram Police FC chuan inkhel thunun zawkin minute 49-ah R Malsawmtluanga (Msa) freekick tha zet chu box chhunga awm Lalhmunmawia chuan tauh lutin an goal hnihna a khung a, Mizoram Police FC chuan 2-0 in hma an hruai zui ta a ni.
Mizoram Police FC chuan nawr chhunzawmin goal thun belhna hun nei zui mahse Lalhmunmawia leh Lalbiakhlua (Hlutea)chuan an hun tha an hmang tangkai thei lo. Chawnpui FC chuan an siphurh sut ngei tumin counter attack-in an nawr a, minute 74-ah Lallawmsanga ball pek tha zet chu C Lalremruata chuan goal-ah chantirin an siphurh a sut then mahse, goal dang erawh an khung thei tawh lo a, Mizoram Police FC chuan 2-1 in hnehna an chang zui ta a ni.