Mizoram Premier League (MPL) Season 8 Round 4 October ni 9, Nilaini tlai Ramhlun North FC leh Mizoram Police FC inkhelah Mizoram Police FC chuan 4-1 a hnehna changin point 3 an hlawh chhuak. He inkhelah hian Mizoram Police FC midfielder R Malsawmtluanga chu Man of the match-ah thlan a ni.

First half-ah Ramhlun North FC chuan Lalremsanga goal hmangin hmahruai mahse second half-ah Mizoram Police FC chuan F Lalrinpuia goal hmangin an siphurh an rul a, Lalsangbera'n goal hnih a khung bakah Lalfakzuala'n Penalty atangin goal khat a khung a, 4-1 in hnehna an chang ta zawk a ni.

Ramhlun North FC hian Chanmari FC an hneh loh hnuah Chawnpui FC an hneh a, FC Venghnuai leh Mizoram Police FC hneh lo leh in point 3 an nei mekin parukna an ni a, Mizoram Police FC hian Chawnpui FC leh Chanmari FC an hneh hnuah Aizawl FC an hneh lo a, Ramhlun North FC hnehin point 9 an nei tawh a, hmahruaitu an nih chhunzawm zel a ni.

04:00 PM Ramhlun North FC 1-4 Mizoram Police FC

(Lalremsanga 8') (F Lalrinpuia 69', Lalsangbera 77', 82', Lalfakzuala 90' (P)

MoM: R Malsawmtluanga, Mizoram Police FC

Inkhel tan a ni a, Mizoram Police FC chuan inkhel thunnun zawk mahse, Ramhlun North FC chuan goal an khung hmasa zawk a, minute 8-ah defender Lalnunzira corner pet chu box chhunga awm midfielder Lalremsanga chuan tauh lutin anhmahruaina a khung.

Mizoram Police FC chuan inkhel thunun chhun zawmin an siphurh sutna hum tha an nei nual a, R Malsawmtluanga corner pet chu Fakzuala'n goal kham atauh per hnuah Fazuala chuan Ramhlun North FC keeper Eddie-a chiah a hmachhawn hnuah Eddie-a chuan a dan sak.

Mizoram Police FC chuan nawr chhunzawmin R Malsawmtluanga (Msa) ball pek chu Sawmfela'n vawi hnih goal sirah a tauh a, goal dang lut lo in Ramhlun North FC chuan 1-0 a hmahruaiin chawlhlawk an hmang ta a ni.

Second half-ah Mizoram Police FC insiam thain Lalbiaksanga Colney chuan Lalsangbera, Lalbiakhlua leh F Lalrinpuia rawn luh tirin danglamna an thlen nghal Lalsangbera chuan penalty hlawh chhuak mahse goal erawh a khung lo a, minute 69-ah Lawmzuala ball vawrh luh tha zet chu F Lalrinpuia chuan goal-ah chantirin an siphurh a rul.

Mizoram Police FC chuan nawr chhunzawmin Sangbera chuan goal hnih a khung zui ve leh a, Mizoram Police FC chuan 3-1 in hma an hruai zui ta a ni. Goal dang luh belh lo in Mizoram Police FC chuan 3-1 in hnehna an chang dawn emaw tih hnu huntawp dawn injury time-ah Fakzuala'n penalty a hlawh chhuah chu goal-ah chantirin an goal li na akhunga 4-1 in hnehna an chang zui ta a ni.

Ramhlun North FC hian October ni 11, Zirtawpni zan dar 7:00-ah Chhinga Veng FC an hmachhawn ang a, Mizoram Police FC hian tlai dar 4:00-ah Electric Veng FC an hmachhawn ang.

(adsbygoogle = window.adsbygoogle || []).push({});