Mizoram Premier League (MPL) Season 8 Round 2 match hmasa ber September ni 12, Niangni tlai Chanmari FC leh Mizoram Police FC inkhelah Mizoram Police FC chuan 3-2 a Chanmari FC hnehin point 3 hlu tak an hlawh chhuak. He inkhelah hian Chanmari FC midfielder David Lalrinmuana chu Man of the match-ah thlan a ni.
Team pahnih te hian round 1-ah hnehna an chang ve ve a, MFA Super cup final-ah Mizoram Police FC hian Chanmari FC hi penalty Shootout-ah hnehin an champion a, team tha zawk an nih lantirin hnehna an chang nawn leh ta a ni. khelh tawhah Mizoram Police FC hian point 6 neiin hmahruaitu an ni mek a, Chanmari FC hian point 3 neiin pahnihna ni mahse, round 2 khelh zawh ala ni lo a, table hi ala danglam thei a ni.
04:00 PM Chanmari FC 2-3 Mizoram Police FC
(David Lalrinmuana 5', 80') (Lalbiakhlua 34', Malsawmfela 48', Lalbiaknunga 89')
MoM: David Lalrinmuana, Chanmari FC
Inkhel tan a ni a, team pahnih te an innawr tawn zak zak hnuah Chanmari FC chuan an hun tha neih hmang tangkai hmasa zawkin minute 5-ah box pawn chiah atangin David Rinmuana chuan mawitakin an hmahruaina a khung. Mizoram Police FC pawhin an siphurh sutna hun tha nei ve bawkin Fakzuala chuan Chanmari FC keeper T. Mawia chiah a hmachhawn hnuah goal sir chiahah a pet. Chanmari FC pawhin goal thun belhna hun tha neiin Vanlalnghenga ball pek tha zet chu Lalrammuanpuia (Apuia) chuan goal-ah a chantir thei lo.
Mizoram Police FC chuan first half huntawp dawn minute 11 ala awmin an siphurh an sut. An siphurh an sutna goal hi mual dinglam sir atanga F Lalrinpuia (Valpuia) ball pek tha zet chu box chhunga awm Lalbiakhlua (Hlutea) chuan chiang zetin a tauh lut a, 1-1 a inhneh tawkin hun chanve an hmang zo.
Second half-ah Mizoram Police FC chuan inkhel thunun zawkin minute 48-ah Malsawmtluanga (Msa) freekick tha zet Chanmari FC keeper T. Mawia danper nangchinin bench atanga lut Malsawmfela chuan an goal hnihna a khung. Mizoram Police FC chuan goal thun belhna hun tha nei zui mahse, Lalbiakhlua (Hlutea) leh F Lalrinpuia (Valpuia) chuan an hun tha an hloh.
Chanmari FC chuan an siphurh sut ngei tumin counter attack-in an nawr let a, minute 80-ah freekick atangin David Rinmuana chuan an siphurh sutna mawitakin a khung ve leh ta a ni. Goal lut awm tawh lo in 2-2 a inhneh tawkin khelmual an chhuahsan dawn emaw tih hnu huntawp dawn minute 1 ala awmin Mizoram Police FC tan defender Lalbiaknuanga'n half way line bul sir dinglam atangin an goal thuna a khung a, Mizoram Police FC chuan 3-2 in hnehna an chang zui ta a ni.
Chanmari FC hian October ni 3, Ningani tlai dar 4:00-ah Chhinga Veng FC an hmachhawn ang a, Mizoram Police FC hian October ni 4, Zirtawpni tlai dar 4:00-ah Aizawl FC an hmachhawn ang.
(adsbygoogle = window.adsbygoogle || []).push({});