30 Oct 2019 11:03

inkhel

MPL 8 hmahruaitu Aizawl FC

Mizoram Premier League (MPL) Season 8 khelh mekah October ni 30, Nilaini tlai round 8 match thumna hmahruaitu nih inchuh I League club Aizawl FC leh Electric Veng FC inkhelah Aizawl FC chuan sihnih faiin Electric Veng an hneh a, point 3 hlu tak an hlawh chhuak.

Team pahnih te hi round 2-ah intawng tawhin goal awmlo in an inhneh tawk a, an intawn vawihnihnaah erawh Aizawl FC chungnung zawkah an tang ta a ni. Aizawl FC hian khelh tawhah point 18 nei tawhin hma an hruai chhunzawm a, Electric Veng FC hian point 14 neiin pahnihna anla ni rih a ni.

Goal lut te hi second half-a lut an ni a, Aizawl FC tan Isak Vanlalruatfela leh F Lalremsanga chuan goal khat ve ve an khung. Man of the match-ah Isak Vanlalruatfela chu thlan zui a ni bawk.

04:00 PM Aizawl FC 2-0 Electric Veng FC

(Isak Vanlalruatfela 86', F Lalremsanga 90')

MoM: Isak Vanlalruatfela, Aizawl FC

First half-ah Electric Veng chuan goal hlauhawm nei hmasa zawkin Jacob Lalrawngbawla freekcik tha zet chu Lalrammawia chuan goal-ah a chantir thei lo. Aizawl FC chuan nawr letin goal hlauhawm an nei nual a, mual dinglam sir atanga F Lalremsanga ball pek luh chu Alfred Keimah Jaryan chuan shot mahse, Electric Veng keeper Neihsanga tan hna hautak atling lo a, Box chhung chiah atanga F Lalremsanga shot tha zet chu keeper Neihsanga chuan adan sak hnuah Rochharzela chuan goal sirah chiah a pet leh bawk. First half huntawp dawnah Aizawl FC chuan goal thunna hun tha neiin box chhung chiah atangin Isak Vanlalruatfela chuan goal ban a pet per dawp bawk. Goal lut awmlo in hun chanve an hmang ta a ni.

Second half-ah Aizawl FC bawk chungnung zawkah tangin goal hlauhawm an nei zui nual a, mual dinglam sir atanga Isak Vanlalruatfela shot tha zet chu Electric Veng keeper Neihsanga chuan a dan sak hnuah Hmangaihkima chuan goal ban apet per dawp bawk.

Aizawl FC chuan huntawp dawn minute 4 ala awmin goal hnih an thun zui a, mual veilam sir atangin Isak Vanlalruatfela'n an hmahruaina akhunga, huntawp dawnah Rochharzela leh Isak Vanlalruatfela thawhrah sengin F Lalremsanga chuan an chak nemnghehna goal a khung. Aizawl FC chuan 2-0 in hnehna an chang zui ta a ni.

November ni 1, Zirtawpni zan dar 7:00-ah Electric Veng FC hian Mizoram Police FC an hmachhawn ang a, November ber ni 2, Inrinni tlai dar 4:00-ah Aizawl FC hian Chawnpui FC an hmachhawn ang.

(adsbygoogle = window.adsbygoogle || []).push({});