Mizoram Premier League (MPL) Season 8 Round 3 match hmasa ber October ni 3, Ningani ni tlai Chhinga Veng FC leh Chanmari FC inkhelah chak zawk awmlo in 2-2 in an inhneh tawk a, point khat ve ve an hlawh chhuak. He inkhelah hian Chhinga Veng FC midfielder C Lalchungnunga chu Man of the match-ah thlan a ni.

Chanmari FC hian khelh tawhah Ramhlun North FC hnehin Mizoram Police FC anhneh lo a, Chhinga Veng FC an draw leh a, point 4 neiin table-ah pathumna an ni mek a ni. Round 3 khelh zawh ala nih loh avangin table hi ala danglam thei. Chhinga Veng FC hian khelh tawhah an khingpui Aizawl FC leh FC Venghnuai an draw ve ve hnuah Chanmari FC an draw leh a, point 3 an nei mek a ni.

04:00 PM Chhinga Veng FC 2-2 Chanmari FC

(MC Malsawmzuala 61', 72') (Lalrammuanpuia 47', Vanlalchhunga 87' (OG)

MoM: C Lalchungnunga, Chhinga Veng FC

First half-ah goal hlauhawm hmuh tur a tam lo a, team pahnih te an in tluk tawk hle a, Chhinga Veng FC chuan goal thunna hun tha nei hmasa zawkin mual dinglam sir atanga midfielder C Lalchungnunga ball pek lut tha zet chu box chhunga awm Thasiama chuan goal sirah chiah a tauh a, Thasiama bawk chuan box chhung chiah atangin goal sirah chiah apet zui bawk.

Chanmari FC oawhin nawr ve bawkin goal thunna hun tha an nei a, box chhung chiah atanga defender Vanlalnghenga pet tha zet chu a goal dawn nia alan laiin Chhinga Veng FC keeper T Mawia chuan a dang hman a, forward Lalrammuanpuia (Apuia) chuan a hun tha a hloh hnuah first half huntawp dawnah midfielder Lalremruata pet chu goal kham chungah chiah akal zui bawk.

Second half tan a ni a, Chanmari FC chuan an hun tha neih an hmang tangkai nghal. Miinute 2 aral hmain Lalrammuanpuia (Apuia) chuan ball tha hmuh chu box-ah lalutin an hmahruaina a khung. Chhinga Veng FC chuan nawr letin minute 61-ah an siphurh an sut ve bawk. An siphurh an sutna goal hi Thasiama goal shot Chanmari FC keeper Ruatpuia (Mama) danper nangchinin bench atanga lut MC Malsawmzuala chuan a khung a ni.

Chhinga Veng FC chuan henhna chan ngei tumin an nawr let a, minute 72-ah Thasiama penalty hlawh chhuah chu MC Malsawmzuala bawk chuan goal-ah chantirin an goal hnihna a khung leh bawk. Chanmari FC chuan an siphurh hi an sit tawh dawn lo emaw tih hnu huntawp dawn minute 3 ala awmin Chhinga Veng FC defender Vanlalchhuanga chuan an lamah a tauh lut hlauh a, Chanmari FC chuan an siphurh an lut hram. Chak zawk awmlo in 2-2 a inhneh tawkin khelmual an chhuah san ta a ni.

October ni 8, Thawhlehni zan dar 7:00-ah Chanmari FC hian Aizawl FC an hmachhawn ang a, October ni 9, Nilaini zan dar 7:00-ah Chhinga Veng FC hian Electric Veng FC an hmachhawn ang.

(adsbygoogle = window.adsbygoogle || []).push({});