09 Oct 2019 11:00

inkhel

​MPL 8 Chhinga Veng FC-in Electric Veng FC an hneh

Mizoram Premier League (MPL) Season 8 Round 4 match hnuhnung ber October ni 9, Nilaini zan Chhinga Veng FC leh Electric Veng FC Inkhelah Chhinga Veng FC chuan 2-1 a Electric Veng FC hnehin point 3 anhlawh chhuak. He inkhelah hian Chhinga Veng FC midfielder Lalsawmzela chu Man of the match-ah thlan a ni. Chhinga Veng FC tan Vanlalzuidika leh MC Malsawmzuala chuan goal khat ve ve an khung a, Electric Veng FC tan PC Laldinpuia chuan goal khat a khung ve bawk.

Chhinga Veng FC hian Aizawl FC, FC Venghnuai leh Chanmari FC an draw hnuah Electric Veng FC an hneh a, khelh li atangin point 6 an nei a, pahnihna an ni mek. Electric Veng FC hian FC Venghnuai leh Aizawl FC an draw hnuah Chawnpui FC hnehin Chhinga Veng FC an hneh lo a, point 5 neiin asang paruk zingah an tel pha thung.

07:00 PM Chhinga Veng FC 2-1 Electric Veng FC

(Vanlalzuidika 26', MC Malsawmzuala 75' (P) (PC Laldinpuia 85')

MoM: Lalsawmzela, Chhinga Veng FC

First half-ah Chhinga Veng FC chuan inkhel thunun nghal mahse, goal erawh an thun mai thei lo a, Electric Veng FC pawhin goal thunna hun tha an nei bik lo. Chhinga Veng FC chuan minute 26-ah an hun tha neih hmang tangkaiin Man of the match a thlan Sawmzela freekick tha zet Electric Veng FC keeper Muansanga danper chu Chhinga Veng FC defender Vanlalzuidika chuan goal-ah chantirin an hmahruaina a khung.

Chhinga Veng FC chuan nawr chhunzawmin box pawn chiah atanga Sawmzela shot tha zet chu Electric Veng FC keeper Muansanga chuan a dan sak hnuah box chhung chiah atanga Sawmzela shot chu a goal dawn nia alan laiin Electric Veng FC defender Nunmawia chuan adang hman bawk. 

Huntawp dawnah Chhinga Veng FC chuan goal thun belhna hun tha nei mahse forward Malsawmdawnga chuan ahun tha neih a hmang tangkai thei lo a, goal luh belh lo in Chhinga Veng FC chuan 1-0 a hmahruaiin chawlhlawk an hmang ta a ni.

Second half-ah Electric Veng FC chuan nawr nghalin goal thunna hun tha nei nual mahse goal an thun mai thei lo. Forward David Lalchhuanawma shot tha zet chu a goal dawn nia alan laiin Chhinga Veng FC defender Vanlalzuidika chuan adang hman a, Jacob Lalrawngbawla chuan a hun tha neih a hloh bawk.

Chhinga Veng FC coach Remruata chuan Siaha tlangval tawn hriat nei tha forward MC Malsawmzuala luh tirin minute 75-ah penalty a hlawh chhuak. He penalty hi MC Malsawmzuala chuan goal-ah a chantir a 2-0 in Chhinga Veng FC chuan hma an hruai ta a ni. 

Electric Veng FC an beidawng lo. An siphurh sut ngei tumin annawr let a, huntawp dawn minute 5 ala awmin Ramhlunchhunga free kick tha zet chu Defender PC Laldinpuia chuan tauh lutin an siphurh sut then mahse, hunin adaih seng tawh lo a, Chhinga Veng FC chuan 2-1 in hnehna an chang zui ta a ni.

Chhinga Veng FC hian October ni 11, Zirtawpni zan dar 7:00-ah Ramhlun North FC an hmachhawn ang a, Electric Veng FC hian tlai dar 4:00-ah Mizoram Police FC an hmachhawn ang.

(adsbygoogle = window.adsbygoogle || []).push({});