07 Sep 2019 12:30

inkhel

​MPL 8 Chanmari FC-in Ramhlun North FC an hneh

Mizoram Premier League (MPL) Season 8 Round 1 match hnuhnung ber September ni 6, Zirtawpni zan Chanmari FC leh Ramhlun North inkhelah Chanmari FC chuan 3-1 a Ramhlun North FC hnehin point 3 an hlawh chhuak. He inkhelah hian Chanmari FC midfielder H Lalmuankima chu Man of the match-ah thlan a ni.

Chanmari FC hian Malsawmtluanga (Mama) kaihhruaina hnuaiah MFA Super Cup final an lut nghal a, team tha an nih zia lantirin MPL 8 an match hmasa berah hnehna an chang nghal. Chanmari FC tan H Lalmuankima, Lalnunzama leh MS Dawngliana chuan goal khat theuh an khung a, Ramhlun North FC tan Jessey Vanlalmuana chuan goal khat a khung ve bawk.

07:00 PM Chanmari FC 3-1 Ramhlun North FC

(H Lalmuankima 16', Lalnunzama 54', MS Dawngliana 90+4') (Jessey Vanlalmuana 44')

MoM : H Lalmuankima, Chanmari FC

Inkhel tan a ni a, team pahnih te an innawr tawn zak zak hnuah Chanmari FC chuan an hun tha neih hmang tangkai hmasa zawkin minute 16-ah midfielder David Rinmuana corner pet tha zet chu box chhunga awm H Lalmuankima (Mka) chuan goal-ah chantirin anhmahruaina a khung.

Chanmari FC chuan nawr chhunzawmin forward Lalnunzama chuan goal thun belhna hun tha vawihnih nei mahse, a hmang tangkai thei lo. Ramhlun North FC pawhin an siphurh sutna hun tha neiin box chhung dinglam sir atanga Lalnunzira shoot tha zet chu a goal dawn nia alan laiin Chanmari FC keeper T Mawia chuan a dang hman hlauh. Ramhlun North FC chuan an nawr chhunzawm a, huntawp dawn minute 1 ala awmin freekick atangin forward Jessey Vanlalmuana chuan an siphurh sutna mawi takin a khung a, 1-1 a inhneh tawkin chawlhlawk an hmang zui ta a ni.

Second half-ah Chanmari FC chuan inkhel thunun zawkin minute 54-ah box pawn chiah atangin Lalnunzama chuan an goal hnihna chiang zetin a chhuih lut. 2-1 in Chanmari FC chuan hma an hruai ta a ni. Ramhlun North FC chuan an siphurh sut ngei tumin counter attack-in annawr let a, Lalmawizuala (Astea) freekick tha zet chu a goal dawn nia lan laiin Chanmari FC keeper T Mawia chuan a dang hman a, Chanmari FC an him hram.

Goal dang luh belh tawh lo in Chanmari FC chuan 2-1 in hnehna an chang dawn emaw tih hnu huntawp dawn added time-ah Chanmari FC tan MS Dawngliana (Dawngtea) chuan an chak nemnghehna goal a khung zui leh a, 3-1 in hnehna an chang zui ta a ni.

Chanmari FC hian September ni 12, Ningani tlai dar 4:00-ah Mizoram Police FC an hmachhawn ang a, Ramhlun North FC hian September ni 13, Zirtawpniah tlai dar 4:00-ah Chawnpui FC an hmachhawn ang.

(adsbygoogle = window.adsbygoogle || []).push({});