Mizoram Premier League (MPL) Season 8 Round 1 September ni 6, Zirtawpni tlai Aizawl FC leh Chhinga Veng FC Inkhelah chak zawk awmlo in 2-2 in an inhneh tawk a, point 1 ve ve an hlawh chhuak. He inkhelah hian Chhinga Veng FC midfielder Lalsawmzela chu Man of the match-ah thlan a ni.
Aizawl FC hian season liamta I League-a an coach Standly Rozario an ruai chhunzawm a, MFA Super Cup-ah club lam inpeih loh avangin an tel lo a, MPL-ah erawh player te inpeih fel tawh mahse, beisei erawh an phak lo. Chhinga Veng FC hian coach thar hnuaiah MPL 8 an khel a, season hmasa an coach Lalsangzuala Hmar chuan Electric Veng FC a enkawl tak avangin season hmasa erawh an phak lo.
04:00 PM Aizawl FC 2-2 Chhinga Veng FC
(Isak Vanlalruatfela 27', Lalramhmunmawia 90+4') (MC Malsawmzuala 43' (P) 71')
MoM: Lalsawmzela, Chhinga Veng FC
Inkhel tan a ni a, team pahnih te an intluk tawk hle. Goal hlauh awm erawh hmuh tur a tam lo thung. An innawr tawn zak zak hnuah Aizawl FC chuan goal thunna hun tha nei hmasa zawkin box chhung chiah atanga forward F Lalremsanga shoot tha zet chu Chhinga Veng FC keeper Lalruatpuia chuan a dan sak. Aizawl FC chuan nawr chhunzawmin minute 27-ah hnai tak atangin Isak Vanlalruatfela chuan an hmahruaina a khung.
Chhinga Veng FC an talbuai lo. An siphurh sut tumin annawr let a, first half huntawp dawn minute 2 ala awmin box chhungah Aizawl FC defender Juuko Richard hand ball avangin Chhinga Veng FC chuan penalty an hlawh chhuak hlauh. He penalty hi forward MC Malsawmzuala chuan goal-ah chantirin an siphurh a rul zui a, 1-1 a inhneh tawkin chawlhlawk an hmang.
Second half-ah pawh team pahnih te an innawr tawn leh zak zak a, Chhinga Veng FC chuan goal thun belhna hun tha nei hmasa zawkin defender Lalthlahlova'n goal thun belhna hun tha a hloh. Minute 71-ah free kick atangin MC Malsawmzuala bawk chuan an goal hnihna khungin 2-1 in Chhinga Veng FC chuan hma an hruai ta a ni.
Aizawl FC chuan an siphurh sut tumin nawr let a, an siphurh sutna hun tha Lalhriatrenga chuan nei mahse, goal erawh a khung thei lo. Goal luh belh tawh lo in Chhinga Veng FC chuan 2-1 in hnehna an chang tawh dawn emaw tih hnu huntawp dawn added time-ah Aizawl FC tan Joe Zoherliana ball pek tha zet chu box chhunga awm defender Lalramhmunmawia chuan goal-ah chantirin an siphurh a rul a, 2-2 a inhneh tawkin khelmual an chhuah san zui ta a ni.
Aizawl FC hian September ni 12, Ningani zan dar 7:00-ah Electric Veng FC an hmachhawn ang a, Chhinga Veng FC hian September ni 13, Zirtawpni zan dar 7:00-ah kai thar FC Venghnuai an hmachhawn ang.
(adsbygoogle = window.adsbygoogle || []).push({});