Mizoram Premier League (MPL) Season 8 Round 5 October ni 10, Ningani zan I League club Aizawl FC leh Chawnpui FC inkhelah Aizawl FC chuan 2-0 a Chawnpui FC hnehin point 3 an hlawh chhuak. He inkhelah hian Aizawl FC midfielder Paul Ramfangzauva chu Man of the match-ah thlan a ni. 

Goal lut te hi second half-a lut ve ve an ni a, Aizawl FC tan Alfred Keimah Jaryan leh F Lalremsanga chuan goal khat ve ve an khung. Aizawl FC hian khelh tawh point 9 neiin table-ah pahnihna an ni a, Chawnpui FC hian point 1 nei tawhin a mawngphah anla luah lum rih a ni.

07:00 PM Aizawl FC 2-0 Chawnpui FC

(Alfred Keimah Jaryan 58', F Lalremsanga 77')

MoM: Paul Ramfangzauva, Aizawl FC

Aizawl FC XI: Lalawmpuia (GK) Juuko Richard, Rocharzela, Paul Ramfangzauva, Sangdingliana, Joe Zoherliana, Alfred Kemah Jaryan, K Lalhmangaihkima, C Lalrosanga, F Lalremsanga, Lalramhmunmawia

Chawnpui FC XI: Vannunmawia (GK) C Lalremruata, Remruatpuia, Lalmalsawma, Lalnunmawia, Moody Lalawmpuia, Jerry F Zonunsanga, Jonathan Lalhriatkima, Lallawmsanga, Larry Lalrinawma, Lalnunpuia Tlau

First half-ah goal lut awmlo mahse goal hlauhawm erawh a awm nual a, inkhel tan anih hnuah chhumzing vangin vawi hnih chawlh lailawk a ni. Inkhel tan a nih hnuah Aizawl FC chuan goal thunna hun nei nghal mahse forward F Lalremsanga'n box pawn chiah atanga a shot tha zet chu Chawnpui FC defender Remruatpuia chuan adang hman hlauh.

Chawnpui FC pawhin goal thunna hun nei ve bawkin mual dinglam sir atanga forward Lalnunpuia shot tha zet chu Aizawl FC keeper Awpa chuan a dan sak.

Aizawl FC chuan goal thunna hun tha annei zui ve leh a, Rochharzela leh F Lalremsanga chuan anhun tha neih an hman tangkai thei loh hnuah Aizawl FC chuan penalty an hlawh chhuak hlauh. F Lalremsanga lo pen chhuakin Chawnpui FC keeper Nunmawia chuan a dan sak a, box pawn chiah atanga Rochharzela shot tha zet chu a goal dawn nia alan laiin Nunmawia chuan adan sak leh bawk.

Second half-ah chhumzing vangin vawi thum chawlh lailawk a ni zui leh bawk. Aizawl FC chuan chawlh lawk an hmang tangkai tih a hriat nghal a, Inkhel thunun zawkin minute 58-ah Paul Ramfangzauva freekick tha zet chu state pawn player Alfred Kemah Jaryan chuan chhuih lutin an hmahruaina a khung.

Aizawl FC chuan goal thun belhna hun tha nei zuiin bench atanga lut Isak Vanlalruatfela chuan a hun tha neih hloh a, minute 77-ah Isak Vanlalruatfela ball pek tha zet chu F Lalremsanga chuan penalty apet luh loh khuh nan mawi takin a tauh lut a, 2-0 in hma an hruai ta a ni.

Huntawp dawnah bench atanga lut Jonathana Lalrawngbawla'n Aizawl FC goal thumna khung mahse faul vangin goal-ah pawm ni lo a, Aizawl FC chuan 2-0 in hnehna an chang zui ta a ni. Round 6 hi Kolasib khelmualah khelh a ni dawn a, October ni 18, Zirtawpniah Aizawl FC hian FC Venghnuai an hmachhawn ang a, Chawnpui FC hian Chanmari FC an hmachhawn ang.

(adsbygoogle = window.adsbygoogle || []).push({});