MPL 7 Semifinal First Leg-ah Chhinga Veng FC an chak

25th November 2018, 04:11AM

November ni 24, Inrinni zan Mizoram Premier League (MPL) season 7 semifinal thawh khatna Chanmari FC leh Chhinga Veng FC inkhelah Chhinga Veng FC chuan MS Dawngliana goal khat hmangin Chanmari FC an hneh. He inkhelah hian Chhinga Veng FC defender PC Laldinpuia chuan of the match-ah thlan a ni. Aizawl FC leh Mizoram Police FC te hian November ni 26, Thawhtanni zan dar 7:30-ah Semifinal first leg an khel ve ang.

Chanmari FC 0-1 Chhinga Veng FC

(MS Dawngliana 55' (P)

MoM: PC. Laldinpuia, Chhinga Veng FC.

Goal awm chhun hi second half-a lut a ni a, Chhinga Veng tan penalty a tang a MS Dawngliana khung a ni. First half-ah team pahnih te an innawr tawn zak zak a, goal hlauhawm hmuh tur a awm lo. Second half -ah Chhinga Veng chuan inkhel thunun nghalin goal thunna hun tha an nei nghal a, box chhung chiah a tang a foreigner forward Geth Arthur Diomande shot tha zet chu Chanmari FC keeper Lalruatpuia chuan a dan sak a,  Lalromawia shot tha zet chu Chanmari defender R. Lalawmpuia chuan a dang hman hlauh bawk.

Chhinga Veng chuan nawr chhunzawmin minute 55-ah Chanmari defender C. Muana hand ball vangin Chhinga Veng chuan penalty an hlawh chhuak. Forward MS Dawngliana (Dawngtea) chu lo pen chhuakin chiangin a pet lut a, Chhinga Veng chuan sikhat faiin hmaanhruai. Chanmari chuan an siphurh sut ngei tumin an nawr let nghal a, Dampuia leh bech a tanga lut Lalnunzama te chuan Chhinga Veng defender te an paltlang thei lo. 

Huntawp dawnah Chanmari rinrawl Jeremy Laldinpuia chuan foul vangin red car a hmu zui bawk nen Chanmari chuan an siphurh sut turin hun tha an nei thei tawh lo a, Chhinga Veng FC chuan 1-0 in hnehna an chang zui ta a ni. November ni 29, Ningani zan dar 7:30-ah Chhinga Veng FC leh Chanmari FC hian Semifinal second leg an khel leh ang a, final lut a hriat tawh ang.

(adsbygoogle = window.adsbygoogle || []).push({});

Copyright © inkhel.com 2024. All rights reserved.