26 Nov 2018 11:20

inkhel

​MPL 7 Semifinal First Leg-ah Aizawl FC-in Police an hneh

November ni 26, Thawhtanni zan Mizoram Premier League season 7 semifinal thawh khatna I League club Aizawl FC leh Mizoram Police FC te inkhelah Aizawl FC chuan 2-1 in Mizoram Police FC an hneh. He inkhelah hian Aizawl FC goalkeeper Lalawmpuia chu Man of the match-ah thlan a ni. November ni 29, Ningani zan dar 7:30-ah Semifinal second leg Chanmari FC leh Chhinga Veng FC ten an khel leh ang a, final lut a hriat ang.

Goal lut te hi first half leh second half-a lut an ni a, first half-ah Aizawl FC tan foreigner Bektur Talgat Uulu goal hmahruai khung chu Second half-ah Mizoram Police FC tan forward Lalfakzuala chuan an siphurh a rul a, Aizawl FC tan foreigner Alfred Kemah Jaryan chuan an chakna goal a khung.

Aizawl FC 2-1 Mizoram Police FC

(Bektur Talgat Uulu 28', Alfred Kemah Jaryan 90+4') (Lalfakzuala 84')

MoM: Lalawmpuia, Aizawl FC

Inkhel tan a ni a, Mizoram Police chuan goal thunna hun tha nei nghalin box chhung a tang winger Lalbiakhlua (Biaktea) shot tha zet chu Aizawl FC keeper Awmpuia chuan a dan sak a, box pawn chiah a tang a Sawmfela shot tha zet chu a goal dawn nia alan laiin Aizawl FC keeper Awmpuia chuan a dan sak. Aizawl FC pawhin goal thunna hun nei ve bawkin box chhung a tang a forward Khawpuimawia shot chu Police defender B. Sena chuan a dan hnuah box pawn chiah a tang a Khawpuimawia shot tha zet chu Police keeper Muanawma chuan a dang sak leh bawk.

Aizawl FC chuan minute 28-ah an hun tha neih hmang tangkaiin freekick tangin midfielder Bektur Talgat Uulu chuan mawi takin a pet goal a, goal dang luh belh lo in Aizawl FC chuan sikhat fai a hmahruaiin chawlhlawk an hmang ta a ni.

Second half tan a ni a, Aizawl FC chuan inkhel thunun nghalin goal thun belhna hun tha an nei nghal a, box chhung a tang a Remsanga shot tha zet leh box pawn chiah a tang a Rochharzela shot tha zet chu Police keeper Muanawma chuan a dan sak hnuah bech a tang a lut midfielder Alfred Keamh Jaryan volley chu Muanawma chuan a dang leh bawk. Police chuan an siphurh sut ngei tumin counter attack-in an nawr let a, mual veilam sir a tang a F. Lalrinpuia (Valpuia) ball pek tha zet chu Fakzuala chuan goal sirah chiah a pet.

Goal luh belh tawh lo in Aizawl FC chuan sikhat faiin hnehna an chang dawn emaw tih hnu huntawp dawn minute 6 ala awmin Police tan Lalbiakhlua (Biaktea) ball pek luh tha zet chu Fakzuala chuan box-ah la lutin Aizawl FC keeper Awmpuia chu pet khumin an siphurh sutna goal a khung. Chak zawk awmlo khelmual an chhuah san tawh dawn emaw tih hnu injury time-ah Aizawl FC tan box pawn dinglam sir atangin Alfred Kemah Jaryan chuan mawi takin an chakna goal a khung a, 2-1 in hnehna an chang ta a ni.

Aizawl FC leh Mizoram Police FC te hian December ni 1, Inrinni zan dar 7:30-ah Semifinal second leg an khel leh ang a, Aizawl FC tan final lut turin draw a tawk a, Police tan final lut turin a chhe berah 2-0 a an chak angai tawh

(adsbygoogle = window.adsbygoogle || []).push({});