McDowell's No.1 Soda Mizoram Premier League season 5 final chu December ni 16, 2016 zan khan AR Lammualah khelh a ni a, Chanmari FC chuan si thum faia Bethlehem Venthlang FC hnehin MPL5 Champion an ni ta a ni.

Final-ah hian Chanmari FC tan Umunnakwe, Mabia-a leh MS-a ten goal an khung a. Chanmari FC goal khung khawl Malsawmfela chu MPL5 best forward-ah thlan a nih bakah Best Player-a thlan a ni bawk a ni.

Mizoram Premier League hi season 5 khelh a ni ta a, Aizawl FC ang bawkin Chanmari FC pawhin vawi hnih title an la ta. Mizoram Premier League-ah hian champion thei team pathum chiah an la awm a, Dinthar FC, Aizawl FC leh Chanmari FC te an ni.

Chanmari FC 3-0 Bethlehem Vengthlang FC

Umunnakwe 32', Mabia-a 55', MS-a 90+2'

Chanmari FC XI : F. Lalmuanawma, Umunnakwe Ugochukwu Godswill, Ramfangzauva, Lalrinchhana Tochhawng, C. Lalrosanga, R. Malsawmtluanga, Lalrinchhana, Vanlalbiaa Chhangte, Lalruatfela Zote, Malsawmfela, Dodoz.

Bethlehem Vengthlang FC XI : Malsawmdawngzela, H. Lalhlimpuia, K. Lalmalsawma, Lalrammuanpuia, Hmingthanmawia, Laldinliana Varte, Zosangkima, Samson Ramengmawia, PC Laldinpuia, Lalnunmawia, Zothanpuia.

Chanmari FC goal hmasa pahnihte hi set piece atanga lut a ni a, corner atanga ball kal chu Umunnakwe Ugochukwu Godswill chuan kawh zetin a tauh, 32 mins-ah goal a khung. Second half 55 mins-ah Vanlalbiaa chuan ama free kick hlawhchhuah chu goal-ah a chantir leh bawk a.

Mual veilam sirah Mabiaa chuan free kick a hlawhchhuak a. He free kick hi Malsawmfela chuan petin; ball per chu hnai tak atangin Mabiaa chuan a pet goal a ni. Goal thumna a pui kher mai, box pawn 25 yards vel atangin R. Malsawmtluanga chuan kawh zetin a shot a, Bethlehem Vengthlang FC goalkeeper Malsawmdawngzela chuan a phak lo chiang kher mai, si thum faiin Chanmari FC chuan hnehna an chang ta a ni.

Chanmari FC an chungnung zawk a, goal dang pawh an khung teuh thin hle. Malsawmfela chuan 15 mins-ah box pawn atangin kawh zetin a shot a, Bethlehem Vengthlang FC goal bar a pet per. Dodoz pawhin hemi hnu chiah hian Malsawmfela pass chu dawngin box pawn atangin a shot a, ani shot hi Bethlehem Vengthlang FC goalkeeper Malsawmdawngzela chuan a lo dang tha kher mai.

Bethlehem Vengthlang FC pawhin first half-ah chance tha vawi hnih an nei bawk a, Mawitea chuan clear chance a hmang tangkai lo, hun thawl tak box chhungah a nei, mahse a hmanhmawh luatah a tauh a, zawitein chanmari FC goalkeeper a pass phah. Dina Varte pawhin box pawn atangin kawh zetin a shot a, Chanmari FC goal bar a pet per ve bawk a ni.

Second half-ah Bethlehem Vengthlang FC-in goal khung an tum luatah an tlar hnung an hawng zau a, hetah hian Chanmari FC tan chance an pek phah a, Rammawia shot tha zet chu Malsawmdawngzela chuan a lo dang a, hun tawp dawn minute 15 a la awm tihin Malsawmfela chuan top scorer nih theihna hun tha awmze nei lovah a chhuah.

MPL5 Best Player & Best Forward

A tir atanga a tawp thlengin Chanmari FC an chungnung zawk a, Fela Zote chu inhliam avangin lakchhuah ni mahse Chanmari FC game a danglam phah chuang lo. He match-ah hian Malsawmfela hian goal khat khung selang chuan top scorer ni thei mai tur a nih laiin goal a khung ta lova. Tun season-ah Chanmari FC striker hian goal 11 a khung a, amah aia khel tlem Chanmari West FC forward Dampuia chuan goal 11 tho a khung a, ani hi MPL5 top scorer a ni ta zawk a ni.

• MPL5 mimal lawmman
• Best goalkeeper : Malsawmdawngzela (BVT)
• Best Defender : Lalhlimpuia (BVT)
• Best Midfielder : Lalruatfela Zote (CFC)
• Best Forward : Malsawmfela (CFC)
• Top scorer : Laldampuia Tochhawng (11 Goals/CWFC)
• Best Player : Malsawmfela (CFC)
  
  Photos : PC Lala