11 Sep 2015 05:49

PC Lala

inkhel correspondent and photographer

​MPL 4 tan a ni, Aizawl FC leh Zo United chak nghal

MC Dowell's No.1 Soda Mizoram Premier League Season 4 chu September ni 10, 2015 khan AR Lammualah khelh tan a ni a, a tan niah champion lai Aizawl FC leh Zo United te chuan an khingpui si khat ve vein an hneh nghal.

Aizawl FC chuan H Lalmuankima goal hmangin Chanmari West FC an hneh a, Reitlang FC ni thin, tuna Zo United ni ta pawhin si khat faiin K Lalnunzama goal hmangin MPL season 1 champion Dinthar FC an hneh a ni.

Champion lai leh I-League club Aizawl FC chuan season an kick off a, tlai dar 2:30-ah MPL 4 match hmasa hi tan a ni. Goal awmchhun hi first half 32nd mins-a lut a ni a. Ruatthara leh Valpuia te inthlawp tha tak chuan goal an hlawhchhuak thei lo, hemi per hi H. Lalmuankima chuan goal-ah a chantir ta a ni.

First half minute 30 chhung chu inkhel inbuk tawk tak a ni a, hetih lai hian goal a luh hnuah erawh Aizawl FC an khel tha tawlh tawlh a. Chanmari West FC forward Vanlalbiaa a tal na teuh thin hle a, Aizawl FC defender te a su tlang zo lo a ni. He match-ah hian goal awmchhun khungtu H Lalmuankima chu man of the match a thlan a ni.

Inkhel hnuhnung zawk hi zan dar 7:45PM-a tan a ni a, season hmasa lama Reitlang FC ni thin khan hming an thlak, Zo United tih a ni ta a. Zo United an nih hnua MPL match hmasa berah MPL Season 1 champions Dinthar FC chu si khat faiin an hneh a ni.

Inkhel hmuhnawm tak ni lem lo mahse pre-season an hmang tha tih a hriat a, goal erawh a lut lawk thei lo. Chhum a zin nasat lutuk avangin inkhel pawh chawlh lailawk a ni. Goal awm lovin an inhnehtawk dawn emaw tih laiin hun tawp dawn tak tak 90+3 mins-ah Zo United chuan goal an khung tlat mai.

Lalthantluanga ball vawrh tha tak chu K Lalnunzama chuan goal-ah a chantir chhunzawm a. Si khat faiin Zo United hi an chak ta a, he match-ah hian Zo United goalkeeper Lalawmpuia chu man of the match-a thlan a ni.