McDowell's No. 1 Soda Mizoram Premier League Round 3 chu khelh zawh a ni ta a, September ni 25, 2015 khan Chanmari FC leh Mizoram Police FC te chuan an khingpui an hneh ve ve a ni.
Chanmari West FC 2-5 Chanmari FC
(Lalramliana 17’, Vanlalbiaa Chhangte 84’) (Malsawmfela 39’, R. Laldanmawia 44’, 47’, 57’, Rochhingpuia 90’+3 Pen)
Chanmari Derby hmuhnawm takah Chanmari FC chuan 5-2 ngawtin Chanmari West FC an hneh a, Mizoram Police FC pawhin 3-0 in Zo United FC an hneh bawk a ni.
Chanmari West FC tan Lalramliana chuan 17th mins-ah goal hmahruai a khung a, he goal hi Malsawmfela chuan darkar chanve an khelh hnuah a rul. R. Laldanmawia chuan Chanmari FC tan hattrick a siam chhunzawm bawk a. Hun tawp dawn minute 6 la awmin Vanlalbiaa Chhangte chuan Chanmari West FC tan goal khat a khung leh hlauh a. Hun tawp dawn tak takah Rochhingpuia chuan penalty atangin goal a khung leh a, 5-2 in Chanmari FC chuan hnehna an chang ta a ni.
Zo United FC 0-3 Mizoram Police FC
(Vanlalruata 40’ OG, Lalfakawma 53’, Lallawmzuala 62’)
Round 3 match hnuhnung berah Mizoram Police FC chuan coach thar Tialthawnga hnuaiah si thum faiin Zo United FC an hneh a, goal hmasa ber hi first half tawp dawn minute 41-a lut niin, corner atanga Mizoram Police FC ball tha tak chu Vanlalruata chuan an lamah a tauh goal hlauh mai. Second half-ah Lalfakawma leh Lallawmzuala ten Mizoram Police FC tan goal an khung leh bawk a, 3-0 in Mizoram Police FC chuan hnehna an chang ta a ni.
Aizawl FC 3-1 Bethlehem Vengthlang FC
(Alfred Kemah Jaryan 15’, 64’, F. Lalrinpuia 65’) (K. Lalthathanga 24’ Pen)
Round 3 ni hmasa zawkah Aizawl FC chuan 3-1 in Bethlehem Vengthlang FC an hneh a, Aizawl FC tan Alfred Kemah Jaryan chuan goal hnih khungin, F. Lalrinpuia chuan goal khat a khung bawk a. Bethlehem Vengthlang FC tan K Lalthathanga chuan penalty atangin goal khat a khung bawk a ni.
Luangmual FC 1-1 Dinthar FC
(Lalthazuala 75’) (Paul Ramfangzauva 70’)
Luangmual FC leh Dinthar FC te 1-1 in an inhnehtawk a, Dinthar FC chuan counter attack hmangin 70th mins-ah goal an khung a, Ramfangzauva chuan goal a khung a. He goal hi 75th mins-ah Lalthazuala chuan box pawn atangin mawi takin top corner-ah a chhuih goal a, 1-1 in an inhnehtawk ta a ni.
Khelh 3 atangin Aizawl FC chuan an khingpui an la hneh vek a, point 9 neiin league hmahruaitu an ni mek. An hnuaiah chiah hian Chanmari FC an awm a, khelh thum atangin point 6 an nei a. Point 4 nei hi team thum an awm a, Bethlehem Vengthlang FC, Luangmual FC leh Zo United FC te an ni a, BVT FC chu pathumna niin, Luangmual FC palina an ni a, Zo United chu pangana an ni a.
Mizoram Police FC chuan coach thar hnuaiah point 3 an hlawhchhuak ve ta a, 6-na an ni a, Chanmari West FC pawhin point 3 tho nei mahse 7-na an ni a, Dinthar FC erawhin point khat chiah an nei a, table mawngphah an ni mek ani.