30 Sep 2015 06:32

Inkhel

Mizo Sports Website hmasa ber

​MPL 4: Goal ropui hmangin Dinthar FC leh Luangmual FC an chak

McDowell's No. 1 Soda Mizoram Premier League Round 4 chu vawiin khan khelh a ni a, match hmasa zawkah table mawngphah Dinthar FC chuan league hmahruaitu Aizawl FC chu 2-1 in an hneh a, inkhel hnuhnung zawkah Luangmual FC chuan 2-1 bawkin Bethlehem Vengthlang FC an hneh bawk a ni.

Vawiin match-a chakna goal hi a mawi dun hle a, Dinthar FC chakna goal khungtu hi Lalkhawpuimawia a ni a, mawi takin a volley goal a ni. Inkhel hnuhnung zawka Luangmual FC chakna goal khungtu Laldinliana Varte pawhin free kick atangin mawi takin top corner-ah a thlawh lut bawk a ni.

Dinthar FC chakna Lalkhawpuimawia

First half-ah goal hnih a lut a, Aizawl FC tan Brandon VL Remdika chuan tan atanga minute 6-na lekah goal a khung nghal. set piece atanga ball kal zel chu Brandon hian hnai tak atangin a pet goal a. He goal hi 30th mins-ah Dinthar FC chuan Tlangthanpuia Ralte hmangin an rul a, Lalhlima ball vawrh tha tak Aizawl FC defender ten an clear that tawk loh chu Tlanga chuan kawh zetin a pet goal chhunzawm a ni.

Dinthar FC 2-1 Aizawl FC

(Tlangthanpuia Ralte 30’, Lalkhawpuimawia 90’) (Brandon VL Remdika 6’)

Man of the match: H. Lalhlimpuia (Dinthar FC)

Second half-ah Aizawl FC lamin ball chang hnem mahse goal chance erawh an nei tam thei lo. 1-1 in an inhnehtawk tawh mai dawn emaw tih laiin 90th mins-ah Lalkhawpuimawia chuan Dinthar FC tan goal ropui a khung. Aizawl FC defender ten ball an clear hla thei lo, hei hi Lalkhawpuimawia chuan mawi lutukin a volley goal a, 2-1 in Dinthar FC chuan hnehna an chang ta a ni.


Luangmual FC chakna Laldinliana Varte

Inkhel hnuhnung zawkah Luangmual FC chuan 2-1 in Bethlehem Vengthlang FC an hneh a, first half-ah Bethlehem Vengthlang an khel tha a, goal pawh an khung nghe nghe. First half hun tawp dawn-ah MS Dawngliana chuan mual veilamah ball lain, a lai lamah a tlan luhpui a, 25 yards vel atang chuan tha takin a shot a, top corner-ah a thlawk lut, si khat faiin first half-ah Bethlehem Vengthlang FC chuan hma an hruai.

Bethlehem Vengthlang FC 1-2 Luangmual FC

(MS Dawngliana 45') (Francis Zonuntluanga 55', Laldinliana Varte 90+3)

Man of the Match: Francis Zonuntluanga (Luangmual FC)

Red Card : K. Lalthlahlova (Luangmual FC)

Second half-ah Luangmual FC an rawn khel tha zawk a, 55th mins-ah Francis chuan goalkeeper ben per chu pen 15 vel atang chuan kawh zetin a pet goal a, Luangmual FC si phurh a rul. 90+3 mins-ah Luangmual FC chuan box pawn kil sir atangah free kick an hlawh chhuak tlat mai. Laldinliana Varte chuan he free kick hi goal ropui takah a chhuah ta a, far post lamah top corner-ah a thlawh lut, hei hi Luangmual FC chakna goal a ni chhunzawm ta a ni.

Luangmual FC chuan point 7 an rawn nei ve ta a, table-ah pahnihna an ni mek, Aizawl FC hnehtu Dinthar FC pawhin point 4 an nei ve ta a, Chanmari West FC leh Mizoram Police FC te an rawn zuan khum a, hetih lai hian September ni 30, 2015 hian Chanmar FC leh Zo United FC an khel anga, Mizoram Police FC leh Chanmari West FC an khel bawk anga, an results hian table a rawn ti danglam leh thei dawn a ni.

photo : PC Lala