McDowells No 1 Soda Mizoram Premier League Round 1 chu September ni 11, 2015 khan AR Lammualah khelh zawh a ni ta a, Bethlehem Vengthlang FC leh Chanmari FC te chuan hnehna an chang a, season kick off niah Zo United leh Aizawl FC te an chak bawk a ni.
Chanmari FC chuan si thum faiin Luangmual FC an hneh a, Chanmari FC tan Rochhingpuia leh Ramengmawia ten goal an khung a, Ramengmawia hian goal hnih a khung nghe nghe a ni. Bethlehem Vengthlang FC chuan 2-1 Mizoram Police FC an hneh bawk a, Bethlehem Vengthlang FC tan Laldingngheta leh Lalrinchhana ten goal an khung a, Mizoram Police FC tan Lalruatfela chuan goal khat a khung bawk a ni.
Chanmari FC 3 - 0 LuangmualFC
Rochhingpuia 62', Ramengmawia 88',90',
Man of the Match - Ramengmawia (Chanmari FC)
Chanmari FC chuan coach thar HC Zarzoliana hnuaiah season bul an tan tha hle a, goal te hi second half-a lutte an ni a, 62nd mins-ah Achia ball vawrh tha tak chu Chanmari FC captain Chhinga chuan a tauh goal a. Bench atanga rawn lut Ramengmawia chuan hun tawp minute hnih chhungin goal hnih a khung a, man of the match-ah bench atanga rawn lut leh goal hnih khungtu Ramengmawia thlan a ni ta a ni.
Inkhel tir atangin Chanmari FC hian game an thunun a, goal erawh an khung lawk thei lova, Sawmfela a tal na leh hle, Luangmual defender te tan harsatna a siam fo a, an player tha thenkhat an hloh hnuah Chanmari FC hi tlahniam tura ngaih an ni a, I-Day ah pawh beisei an phak lo hle, mahse Zara hnuaiah team thar an din mek a, season bul tha takin an tan ta a ni.
Bethlehem Vengthlang FC 2-1 Mizoram Police FC
(Laldingngheta 43', Lalrinchhana 77') (Lalfakzuala 14')
Man of the Match : Lalruatfela (Bethlehem Vengthlang FC)
Bethlehem Vengthlang chuan 2-1 in Mizoram Police FC an hneh a, first half-ah goal hnih a lut a, Mizoram Police FC tan Lalfakzuaka chuan tan atanga minute 14-na lekah goal a khung.He goal hi first half tawp dawn 43rd mins-ah Laldingngheta chuan Bethlehem Vengthlang FC tan a rul.
MFA Super Cup Champions Bethlehem Vengthlang FC hian MPL champion nih an tum ruh hle a, player pawh an lakhawm nasa, season tan nia an khingpui hnehtawk an tum hauh lo, hun tawp dawn minute 13 la awmin Lalrinchhana chuan Bethlehem Vengthlang FC chakna goal a khung ta a, 2-1 in Bethlehem Vengthlang FC chu an chak ta a ni. He match-ah hian Bethlehem Vengthlang FC player Lalruatfela chu man of the match-a thlan a ni.
Chanmari FC, Bethlehem Vengtlang, Zo United leh Aizawl FC te chuan an khingpui an hneh theuhva, Chanmari FC chuan si thum faia an khingpui an hneh avangin point thum hmu zingah an chungnung ta ber a, MPL 4 hmahruaitu an nita nghal a ni.