​MPL 4: Chanmari FC-in Aizawl FC an umphak.

01st October 2015, 05:10AM

McDowell's No. 1 Soda Mizoram Premier League Round 4 chu September ni 30 khan khelh zawh a ni a, Chanmari FC chuan si khat faiin Zo United FC an hneh a, Mizoram Police FC leh Chanmari West FC te chu 2-2 in an inhnehtawk bawk a ni.

Round 4-ah hian Dinthar FC chuan hmahruaitu Aizawl FC an hneh avangin an kal fawr tur an pawt ding a, Chanmari FC chuan hnehna an chan ve leh avangin khelh 4-ah Aizawl FC leh Chanmari FC te hian point 9 ve ve an hlawh chhuak a, goal difference-ah Chanmari FC chungnung mahse head-to-head ah Aizawl FC an chungnun zawk avangin table hmahruaitu an ni chhunzawm ta zel a ni.

Dinthar FC chu hnehna an chan avangin a mawngphah atangin 5-naah an zuang chhuak a, point 4 nei hi team 5 lai (Mizoram Police FC, Dinthar FC, Bethlehem Vengthlang FC, Chanmari West FC leh Zo United FC) an awm avangin head to head a lak theih tawh lova, goal difference en a ni ta a, Dinthar FC chu pangana an ni a, BVTFC chu parukna an ni a, Chanmari West FC chu pasarihna an ni a, Zo United FC erawh a mawngphah an ni ta a ni.

Chanmari FC chakna goal hi hun tawp dawn minute thum la awma Lalrozama Fanai khung a ni a, Chhinga ball pek tha zet chu Rozama hian 87th mins-ah box lai atangin goalkeeper vei lamah a pet a, a goal chiang hle. Goal awmchhun khungtu Rozama hi man of the match-a thlan a ni chhunzawm bawk a ni.

Round 4 match hnuhnung berah Mizoram Police FC leh Chanmari West FC te 2-2 in an inhnehtawk a, Chanmari West FC goalkeeper vawi hnih lai a chesual, goal hmasa ber hi 16th mins-a lut a ni a. Halfway line bul atanga Lalramliana free kick chu a goal ta mai ! Lalramliana hian a pet na pawh a ni lova, a dah kil hle, chutih laiin Chanmari West FC goalkeeper Lalsangpuia a lo up si, a tawlh hnung leh hnu pawhin a ban phak ta lo a ni.

Mizoram Police FC chuan si khat faiin hma hruai mahse Lalramliana chuan Chanmari West FC si phurh a rul a, set piece atangin Lalnunpuia chuan Chanmari West FC hma a hruapui chhunzawm zat a, half time a nih chuan 2-1 in Chanmari West FC chuan hma an hruai. Chanmari West FC hian goal dang chhuah duh tawh lo mahse second half 57th mins-ah goalkeeper tihsual vang bawkin goal an chhuah leh a.

Free ball rawn kal chu Chanmari West FC goalkeeper Sangpuia chuan clear a tum a, box pawnah a tlanchhuak, Lalfakzuala chuan a um a, a hnaihchilh tawh hle, Sangpuia chuan Fakzuala chu a pet per a, hemi per hi Fakzuala chuan a pet goal chhunzawm a, 2-2 in an inhnehtawk ta a ni. Round 5 hi October ni 2 leh ni 3-a khelh tur a ni.

Round 4

Chanmari FC 1-0 Zo United FC

Lalrozama Fanai 87',

Man of the Match : Lalrozama Fanai (Chanmari FC)

Chanmari W FC 2-2 Mizoram Police FC

(Lalramliana 22' , Lalnunpuia 38') (Lalramtharmawia16', Lalfakzuala 57)

Man of the Match : Lalramtharmawi MPFC

picture credit : PC Lala

Copyright © inkhel.com 2024. All rights reserved.