Portuguese manager Jose Mourinho hnuaiah Manchester United chuan hma an sawn hleithei lova, Premier League-ah pariatna niin, champion chu sawi loh, nakkumah hian Champions League an khelh phak pawh a rinawm lo chho viau tawh.

United hotute chuan Mourinho thlaktu tur an melh mek niin media-te chuan an tarlanga, Tottenham manager Mauricio Pochettino chu an iai lo hle niin tarlan a ni bawk. Argentine manager Pochettino chuan Tottenham a enkawl hma hian Southampton a enkawla, a team enkawl apiang-te hian hma an sawn chak thin hle bawk.

Pochettino chuan Spurs chu Premier League-a team tha zingah tun hnaiah a hlangchho meka, tunah pawh Manchester City leh Liverpool chiah phak lovin, pathumnaah an awm mek. United manager Mourinho erawhin United a chet that pui lo hle a, tunah hian hmanhruaitu City lakah point 18 laiin an hnufual tawh.

United hian Louis Van Gaal-a chhuah hnuah Pochettino hi kum 2016 khan lakluh an lo tum tawh a, mahse Pochettino hian United hi a hnar. Pochettino hian tun hnai maiah Spurs-a cham zel turin kum nga daih contract thar a ziak a, mahse United chief-executive Ed Woodward chu a beidawn phah lo.

United hian Mourinho hi tun season-ah an ban a nih chuan Portuguese manager hi zangnadawmna eng emaw zat an pek an ngai dawn a, mahse United hian season tawpah Champions League an khelh phak loh chuan United hian Mourinho hi zangnadawmna an pek hnem lutuk a ngai dawn lo a ni.