​Mourinho leh Klopp-te hian an duh chuan min be mai rawh se: Pep

15th July 2020, 06:07PM

Manchester City chu UEFA Financial Fair Play dan an bawhchhia anga UEFA-in an puha thiamloh an chantir hnuah, thuneitu sang zawk Court of Arbitration for Sport (CAS) chuan City hremna hi an hlihsaka, hemi chungchangah hian Liverpool manager Jurgen Klopp leh Tottenham manager Jose Mourinho te chu City thlawp lo zawngin an lo tawngchhuak tawh.

UEFA chuan City hi a tirah kum hnih chhung UEFA competition-a tel thei lo turin a hrem bakah, euro maktaduai 30 an chawitir bawka, mahse CAS chuan UEFA competition khel thei lo tura City hrem an nihna hlihsakin, an pawisa chawi tur pawh euro makaduai 10-ah a tlak thlak tir bawk.

Hemi chungchangah hian mi tam takin CAS hi an dema, Financial Fair Play chu dan anga ken kawh a ni loah an ngaia, chung zingah hian Mourinho leh Klopp te pawh an tel ve.

Klopp hian CAS-in City hremna an hlihsak khan, football tan a that loh thu a lo sawi tawha, Mourinho hian City hi an dik a nih chuan euro maktaduai 10 an chawi chhan tur a hre lova, an dik lo a nih erawh chuan hrem mai chu thil nihdan tur a nih thu a sawi bawk.

Hemi chungchangah hian City manager Pep Guardiola chuan a manager pui pahnih Klopp leh Mourinho te chhang letin, “Inbiak an duh chuan keichu ka inpeih reng. CAS lama judge pathum te thuchhuah kha a chiang thawkhata, mahse an duh chuan ka phone number an nei a, min rawn be thei renga, ka lo hrilhfiah ang. Harsatna eng mah a awm lo.

“Mahse sawifiah tam tur a awm dawn lova, a chhan chu an thuchhuah kha a chiang tawk viau. Dawt kan sawi ang leh, kan cheat anga pu kan nihna te kha a dik lova, an thuchhuah ang chiah khan eng mah tihsual kan nei lo a ni,” a ti.

Copyright © inkhel.com 2024. All rights reserved.