Sky Sports pundit Jamie Carragher chuan Tottenham chu an inthuahfai deuh ngaiin a hria a, an manager Jose Mourinho chuan a duhdana Spurs a khelh tir dawn chuan player thar pali emaw panga emaw vel a mamawh thu Carragher hian a sawi.

Tottenham hian nikum November thla khan Mauricio Pochettino banin Portuguese manager Jose Mourinho hi an laluta, Mourinho hnuaiah hian eng la ang thei lutuk lovin Spurs hian hma an sawn em em rih lo a tih theih awm e.

Liverpool defender hlui Carragher chuan, “Nipuiah Tottenham hi an inthuah fai a ngai dawna, Pochettino khan league-a champion turin player pakhat emaw pahnih emaw vel a la mamawh khan ka hria a, tunah hi chuan Mourinho hian a khelh duh dana Spurs a khelh tir dawn chuan a beih ve fe a ngai dawna, Pochettino-a level-a awm tur chuan player pali emaw panga emaw vel tal a mamawh a ni,” a ti.

Tottenham hi Premier League-a an game hnuhnung 6-ah vawi hnih chiah an chaka, tunah hian hmahruaitu Liverpool aiin point 31 laiin an hniama, top 4 chu point 9-in an pha lo mek bawk.

Tottenham hi season nga liamta chhung khan top 4 pawnah an awm ngai meuh lova, mahse tun season-ah erawh ngai an awh hleithei lova, Pochettino pawhin a hna a chan phah nghe nghe a, Mourinho chuan season tharah Tottenham hi eng nge a thlen pui theih ang tih chu Premier League ngainatu te hriat chak ber pakhat a ni.