Michael Ballack chuan Jose Mourinho chu Bayern Munich enkawl thei tura duhthusam nia a hriat thu sawiin, dinhmun derthawng tawh tak Niko Kovac thlak tura a duh ber thu a sawi.
Bayern Munich head coach Niko Kovac chuan Allianz Arena-a a season hman hmasak berah boruak a nei duhawm thei vak lo a, hei vang hian a dinhmun pawh a chiang lo chho hle a. Bundesliga season kal mekah Borussia Dortmund chu Bayern title kawl lai laksak thei dinhmunah an ding zel a, UEFA Champions League atangin Liverpool in an pet chhuak tawh bawk a ni.
Bavarian club lian chuan a zawna kum 7 chhung Bundesliga title lak an duh hle a, April 6 khan Borussia Dortmund chu 5-0 ngawtin an hneh a, hei vang hian an beiseina pawh chu a nung thar leh thei a. Heti chung hian executive board chairman Karl-Heinz Rummenigge chuan Niko Kovac-a dinhmun chu a that belh phah rih chuang lo niin a sawi a ni.
German club lian hian coach thar rawih an rilruk a nih tak leh Michael Ballack chuan Jose Mourinho chu lak luh chi ber nia a hriat thu a sawi a. Nikum December thlaa Manchester United in an ban tak Mourinho hian Chelsea a enkawl lai khan Ballack hi a hnuaiah a inkhel ve hman a ni.
Portuguese coach hian hna chelh a la nei zui ta lo reng a, tun hnaiah Inter Milan leh Lyon te nen pawh an sawi zawm ve mek bawk a. Bayern Munich midfielder hlui Ballack chuan Mourinho chu German football khawvelah boruak siam thei ber tur nia a ngaih thu a sawi a. 2013 a Pep Guardiola boruak siam hnuah khatiang boruak kha a awm leh tawh rih lo niin a sawi.
Ballack chuan, “Niko Kovac chu tunah chuan Bayern coach a ni mek a, a hna tha takin a thawk zel a, zah pawh a phu viau a. Mahse, nakinah chuan Mourinho hi rawn lut se ka ti a, Bundesliga boruak nung lo lutuk hi rawn chawk tho leh se ka ti a ni,” a ti.
“A hmain kan lo hmu tawh a, Pep Guardiola khan Bundesliga boruak chu a rawn tinung chiang hle a, Bayern Munich chu Champions League title lakpui ta lo mahse German football kha chu a rawn kai harh chiang khawp mai,” a ti bawk.
A sawi zelnaah, “Guardiola khan inkhelh dan danglam tak a rawn seng lut a, coach tha chungchuang tak a nih zia a rawn lantir a. Guardiola emaw, Mourinho te emaw hi chuan eng boruak emaw tak hi an chhawm tel ngei ngei a, hei vang tak hian Mourinho pawh hian Bayern Munich hi enkawl se ka ti lehzual a ni,” a ti.