09 Oct 2019 08:12

inkhel

Mourinho-a’n Pochettino thlak a hreh lo

Jose Mourinho chuan Tottenham Hotspur boruak a thlithlai ngun hle a, an manager Mauricio Pochettino thlak mai chu a hreh lo hle niin an sawi.

Nikum December thlaah khan Manchester United chuan Jose Mourinho an ban a, Old Trafford-ah 2020 thleng contract nei mah se a hun tawp hmain an ban ta tho a. Hetianga an ban hnuah hian team a la enkawl leh miah lo a, tun hnaiah enkawl bik neih leh chu a duh thu a sawi leh tawh a ni.

Portuguese manager Mourinho hian team a enkawl leh dawn a nih pawhin a tana tha tur leh a duh tak thlan a tum thu a lo sawi chhuak tawh a, a enkawl duh zingah hian Tottenham chu a tel a. Zinedine Zidane enkawl mek Real Madrid chu an sawi ri ve fo bawk a, club president Florentino Perez nen pawh an inbe zui zel a, an inmil hle niin an sawi.

Kum 56-a upa Mourinho hian sawmtu nazawng chu a uksak duh bik mai lo a, a duh bik te chu a nghak ngar ngar mai a. Hemi karah hian TV pundit angin a awm a, season tan hma deuh atang khan Sky chu a zawm a ni.

Mourinho hian a hma deuhin Benfica a lo hnar tawh a, hemi hnuah hian Chinese Super League club Guangzhou Evergrande chuan an thlem leh a, £90 million zet an tawktarh chungin a hnial fithla ta tho a ni.

“Dawhtheihna a pawimawh a, ka tana hun tha a la inher chhuak ngei ang a, ka tana tha ber tur hi ka ngaihtuah a ngai a. Ka team enkawl tur dik tak hi ka lo la nghah ngar ngar a tul a ni,” tiin Mourinho chuan a sawi.

Tun season-ah Tottenham chuan beisei an pha lo hle a, bul an tan that loh em avangin an manager Mauricio Pochettino dinhmun chu a derthawng sawt hle niin sawi a awm a. 2014 kum atang khan Argentine coach kum 47-a upa hian Spurs chu a enkawl tan a, club chuan Pochettino hi ban an la rilruk rih lo niin an sawi a, 2023 thlengin contract a la nei a ni.