Chelsea leh Manchester United manager hlui Jose Mourinho chuan point 8-a hma hruai mek tu Liverpool chu an champion tlang tawh mai a rin thu a sawi.

Liverpool hian anmahni umtu ber leh elpha tur bera ngaih Manchester City chu Anfield-ah 3-1 in an lo hneha, Liverpool hian City hi point 9 laia tlansain pahnihnaa awm Leicester aiin point 8-in an sang bawk.

Premier League-ah khelh 12 chiah khelh la ni mahse manager tawnhriat ngah; Premier League pawh hrechiang em em tu Mourinho chuan Liverpool hi eng emaw rokhawlhna nasa takin a tlakbuak thut te a nih loh chuan an champion tlang tawh mai a ringa, Portuguese pachal ngaihdan tawmpui tu pawh hi an awm nual awm e.

Liverpool hian kum 30 chhung English top-flight league title an la tawh lova, English Premier League tih a nih hnuah an la champion lo. Season hmasa khan point khatin pakhatnaa awm Manchester City an pha lova, tun season-ah erawh champion kai tura rinkai ber an ni meka, an dinhmun pawh a tha chho telh telh.

Mourinho chuan, “Title inchuhna kawngah hi chuan kan hmaa mite hi kan umpha thei tih hriat reng tur a ni a, a chung bera awm kan nih chuan kan hnuaia mite’n min la umpha thei tih hi hriat kar tur a ni bawk. Mahse, title inchuhnaah ka tel lo miaua, chuvang chuan ka dinhmun atang chuan Liverpool hi an champion tlang ka ring tawh.

“Eng emaw rokhawlhna lian tak; inhliamna nasa tak te an tuara an team a buai phah te a nih chuan loh chuan Liverpool hi an champion ka ring. Liverpool team hi puzzle kim lohna nei tawh lo an niin ka hria a, an player-te milin an khel thei tawh.

“City hi a zawnin game riat atanga game kua thleng pawh chak thei an ni a, mahse Liverpool hian an inkara point 9 awm hi an hloh theih ka ring tawh lo a ni,” a ti.