Chelsea manager Jose Mourinho chuan an goalkeeper kalchhuak ta Petr Cech a fak a, Czech Republic goalkeeper hi a thutlukna a hriatthiampui thu a sawi.

Cech hian kum 11 chhung alo chenchilh tawh Chelsea chhuahsanin Arsenal a zawm fel tawh a, The Blues tan hian game 400 chuang khelin intihsiakna lianthamah vawi 13 a champion pui hman bawk.

Kum sawm chhung Chelsea-ah hian goalkeeper rinrawl a ni a, season liamta atang khan Belgian goalkeeper Thibaut Courtois chuan a dinhmun hi a luahlan a khelhna hmun a chang tam lo.

Season tawp hma atang tawhin Chelsea hi chhuahsan tum anga sawi a ni tawh sa a, Jose Mourinho chuan Czech Republic national goalkeeper hi chhuak lo tura a duh thu vawikhat ai tam a sawi nghe nghe.

Khel mumal lo va awm reng ai chuan a khelh phakna tur club lian ni si a melh a, Arsenal-in lakluh an lo duh a £10m sengin an lei.

Cech hian Chelsea a chhuahsan fel hnuin Portuguese manager Mourinho chuan, "Petr hian kum 11 chhungzet Chelsea tan tha takin hna alo thawk tawh a, champion theihna tur awm zawng zawng deuhthawah champion turin a pui bawk."

"Chhuak lo tura ka duh thu ka sawi ziah a, mahse Petr hian kartin first team football khel turin hmundang pan a mamawh tih ka hria. A chang chuan club tana zahawm leh thawhhlawk tak duhdan hi zawm a tul chang a awm thin. Club neitu in hetianga player a chawimawi thei hi ka thlawp."

"Hetianga thutlukna siam hi football-ah hian a thleng khat hle a, hemi vang hian club hi ka chhuang khawp mai. He club-a Petr hlawhtlin tawhnate kha kan hre reng dawn a, a thil tih zawng zawngah lawmthu kan sawi bawk a ni." tiin Chelsea website-ah a sawi.

Mourinho hi Cech siam liantu pawh a tih theih a, kum 2004 khan French club Rennes atangin London club hian an lei a £7m an seng.

Cech pawhin Mourinho hi a zah a, club dang a zawm vang hian an inkungkaihna a chhiat phah dawn lo tih a sawi.

Gunners a zawm tirha an kawmnaah Cech hian, "A ni (Mourinho) tan chuan season liamta tan tir khan thutlukna siam a ngai a, keichuan season thar in tan leh hmaa thutlukna siam ka ngai thung."

"Mahse ka zahna erawh a tawp dawn lo va, a chhan chu hlawhtlinna tam tak kan tawng ho va kan in zah tawn bawk. Khawvela manager tha berte zing ami a ni a, tunah chuan in hmachhawn a ngai dawn ta a mahse kan inkungkaihna a chhiat phah lo ang."

“A hnen atang hian thil tam tak ka zirchhuak. Thutlukna harsa tak siam dawn chuan a tha ber ni a kan ngaih hi a rintlak ngei tih kan fiah hmasa phawt tur a ni," tiin a sawi.