03 May 2019 05:30

inkhel

MotoGP Spanish Grand Prix leh number thenkhat

Pathianni tlai dar 5:30 hian MotoGP Spanish Grand Prix chu Circuito de Jerez-Angel Nieto ah a awm dawn a, world champion Marc Marquez chuan Valentino Rossi tluk theihna hun tha a nei thei dawn a ni.

Marc Marquez chuan qualifying an tlan hunah pole position a chang thei a nih ngat chuan Valentino Rossi a nihrual ang a, pole position chang hnem ber dawttu nihna an hauh thei ang.

Nikum khan helai hmunah hian Marquez chu pakhatna a lo ni tawh a, heti chung hian Rossi record chu a la tluk pha lo hle thung a. FIM MotoGP World Championship standing hmahruaitu ni mek Andrea Dovizioso pawhin mel lung phun theihna hun tha a nei thei dawn bawk a ni.

Spanish Grand Prix leh number thenkhat inkaihhnawih thei te han thlir kual thuak ila.

7 - Valentino Rossi chu Spanish Grand Prix-ah hian vawi sarih a chak tawh a, hetiang zat chak thei hi rider dang an la awm ve lo.

8 - Spanish GP an tlan hnuhnun 11-ah Spanish rider te chu vawi 8 ngawt a chak ber an ni.

5 - Valentino Rossi leh Jorge Lorenzo te chu helai hmuna pole position chang hnem thei ber an ni a, anni pahnih hian vawi nga ve ve an chang tawh a ni.

4 - Jorge Lorenzo chu season li chhung MotoGP intlansiak hmasa palia Top 10 huang chhunga awm thei lo dinhmunah a ding.

54 - Vawi 54 pole position chang tawh Marc Marquez chuan pole position a chang thei a nih chuan Valentino Rossi record (vawi 55) a nihrual thei chiah ang a, premier class-a pole position chang hnem ber Mick Doohan (58) chiah tluk loh an nei ang.

6 - Marc Marquez chu Spanish GP-ah vawi 6 a tel tawh a, hengah hian podium-ah a la lawn ziah a ni.

200 - Andrea Dovizioso chu MotoGP intlansiakah vawi 200 a tlanna chiah a ni ang.

11 - Spanish GP-ah hian Andrea Dovizioso chu vawi 11 a tel ve tawh a, hengah hian podium a la lawn miah lo a. Jerez circuit hi MotoGP khawvelah podium lawn loa a tlan hnemna ber a ni.