Coronavirus darh zel avangin MotorGP lam pawh an la tan thei lo zela, tunah pawh kumin May thla ni 3-a neih tum Spanish Grand Prix chu tiam chin awm lova sawn hlat a ni leh ta.

Season khuhhawn nana ruahman Qatar GP chu coronavirus avangin cancel a lo ni tawha, hemi hnu hian Spanish GP chu season bul tanna tura tih ni leh mahse an sawn hlat leh rih a ngai.

Spanish GP hi race sawn hlat pangana a ni a, a hma in Qatar, Thailand, United States leh Argentina-a neih tum Grand Prix te pawh coronavirus avang hian sawn hlat an lo ni tawh bawk.

COVID-19 chu tunah Spain-ah a darh nasa em em a, thi zat pawh tam tawhin, he hripui lo chhuahna China ai pawhin an tuar tawh zawka, hemi avang hian Spanish GP neih hun tur hi a sawi theih loh.

MotoGP lam hian calendar thar an duang dawna, an theih anga hmaa tih chhuah an tum thu sawiin, tunah rih chuan race dang pawnh sawn hlat an la nih zel a rinawm rih a ni.