19 Jul 2020 07:50

inkhel

MotoGP: Spain ramah Fabio Quartararo a chak ber

Fabio Quartararo chu tun season MotoGP intlansiak hmasa berah pakhatna a ni a, Spanish Grand Prix ah a chak ber niin, pakhatna a nih hmasak ber tum a ni a. Chutiang deuh bawkin Petronas Yamaha in pakhatna dinhmun an hauh hmasak ber a ni bawk.

MotoGP champion lai, Honda rider Marc Marquez chuan he intlansiakah hian tihsual vawi hnih a nei hman a, a tihsual vawi hnihna hi lap 4 chauh tlan tur a awm tawh tihin a thleng a, a tlan tluanchhuak thei ta lo a ni.

Petronas Yamaha rider Fabio Quartararo chuan pole position atangin bul a tan a, an tlan tirhah hian bul a tan fuh vak lo a, hei vang hian lap hmasa berah chuan palinaah a awm nghal a. A tir lamah hian Monster Energy Yamaha rider Maverick Vinales chu hmahruaitu a ni a, Pramac Racing rider Jack Miller pawh a tlan tha hle.

Kawng kawi 4-na velah a hma lama tlan Marc Marquez chu a che fuh lo a, track pawn lamah chuan a tlan chhuak a, world champion ni lai hi a tlu lo hlauh a, intlansiak pawh a zawm ve leh thei a, 18-naah a awm tawh thung.

Maverick Vinales chu lap 17 a la awm tihin a chesual ve zeuh a, pathumnaah a tlak phah a, hemi remchangah hian Fabio Quartararo chuan hma a hruai ve leh a, a hnung deuh chiahah hian Jack Miller chu a awm bawk a ni.

A hnung lamah Marquez chuan hma a sawn chak angreng hle a, lap 5 chauh tlan tur a awm tawh tihin pathumnaah a awm thei hial a. Marquez hian pahnihnaa awm Vinales chu lehpelh tumin tan a la chho a, hetah hian a chesual ta a, track pawnah a tlan chhuak a, a tlan chhunzawm thei ta lo a ni.

French rider Quartararo chu pakhatna niin, Maverick Vinales chu pahnihna a ni a. Ducati rider Andrea Dovizioso chu pathumna a ni a, Jack Miller chu palinaah a thleng bawk a ni.

Top 10:
1. Fabio Quartararo (Petronas Yamaha SRT)
2. Maverick Viñales (Monster Energy Yamaha MotoGP) + 4.603
3. Andrea Dovizioso (Ducati Team) + 5.946
4. Jack Miller (Pramac Racing) + 6.668
5. Franco Morbidelli (Petronas Yamaha SRT) + 6.844
6. Pol Espargaro (Red Bull KTM Factory Racing) + 6.938
7. Francesco Bagnaia (Pramac Racing) + 13.027
8. Miguel Oliveira (Red Bull KTM Tech 3) + 13.441
9. Danilo Petrucci (Ducati Team) + 19.651
10. Takaaki Nakagami (LCR Honda Idemitsu) + 21.553